(गीति)
इंद्रास शूरसेनें, पुशिलें व्रत तें प्रमूख संकष्टी ।
कृतवीर्याला विधिनें, दिधलें तें सांगणें कृपादृष्टी ॥१॥
इंद्र तयासी सांगे, शुभदिन पाहून सतिल करि स्नान ।
नित्यविधि सारुनियां, निश्चय करणें प्रभुव्रता करिन ॥२॥
उपवास करी दिवसा, पूजन करणें गजाननप्रभुचें ।
पुनरपि चंद्रोदयिंही, पूजन करणें दिनापरी साचें ॥३॥
आसन मांडून आधीं, त्यावरि ठेवी सनीर कलशासी ।
त्यावरि ठेवी पीठा, त्यामाजी मूर्त ठेवि यजनासी ॥४॥
हेमाची मूर्त करी, पूजा करि बा यथाविधी राजा ।
वाहे दूर्वा म्हणुनी, नामावलि एकवीस ती ओजा ॥५॥
नंतर प्रार्थू देवा, भोजन द्यावें यथाबलें विप्रां ।
ऐसें आहे व्रत हें, तें करणें चार मास सह-विप्रां ॥६॥