धनविहीनतया तनुता तनौ जनविरोधियेप्सितनाशनम् ।
क्रियगतेऽर्कसुते सुजनैर्नृणां विषमतासमताशमनं भवेत् ॥१॥
युवतिसौख्यविनाशनता भृशं पिशुनसंगरुचिं मतिविच्युतिम् ।
तनुभृतां जनने वृषभस्थितो रविसुतो विसुतोत्सवमादिशेत् ॥२॥
प्रबलताविमलत्वविहीनता भवनबाह्यविलासकुतूहलम् ।
व्रजति नो मिथुनोपगते सुते दिनविभोर्न विभोर्लभते सुखम् ॥३॥
शशिनिकेतनगामिनि भानुजे तनुभृतां कृशतां भृशमम्बया ।
वरविलासकरा कमला भवेदविरलं विरलं रिपुमण्डनम् ॥४॥
लिपिकलाकुशलश्च कलिप्रियो विमलशीलविहीनतरो नरः ।
रविसुते रविवेश्मनि संस्थिते इतनयस्तनयः प्रमदार्तिभाक् ॥५॥
विहितकर्मणि शर्म कदापि नो विनयतोपहतश्चलसौत्दृदः ।
रविसुते सति कन्यकयान्विते विबलताबलतासहितो भवेत् ॥६॥
निजकुलेऽवनिपालबलान्वितः स्मरबलाकुलितो बहुदानदः ।
जलजिनीशसुते तुलयान्विते नृपकृतोपकृतो हि नरो भवेत् ॥७॥
विषहुताशनशस्त्रभयान्वितो धनविनाशनवैरिगदार्दितः ।
विकलिताकलितोऽलिसमन्वितो रविसुतो विसुतेष्टसुखो नरः ॥८॥
रविसुतेन युते सति कार्मुके सुतगणैः परिपूर्णमनोरथः ।
प्रथिककीर्तिसुवृत्तिपरो नरो विभवतो भवतोषयुतो भवेत् ॥९॥
नरपतौ रतिगौरवतां व्रजेद्रविसुते मृगराशिगते नरः ।
अगरुणा कुसमैर्मृगजातया विमलया मलयाचलजैः सुखम् ॥१०॥
ननु जितो रिपुभिर्व्यसनावृतैर्विहितकर्मपराङमुखतान्वितः ।
रविसुते कलशेन समन्विते सुसहितः सहितः प्रचयैर्नरः ॥११॥
विनयताव्यवहारसुशीलतासकललोकगृहीतगुणो नरः ।
उपकृतौ निपुणस्तिमिसंश्रिते रविभवे विभवेन समन्वितः ॥१२॥