पंचक - निश्चयपंचक

॥१॥
देह चिरकाळ राहो ।
अथवा शीघ्रकाळ जावो ॥१॥
आम्हीं वस्ती केली रामीं ।
नाहीं आस्था देहधामीं ॥२॥
देहा होऊं उत्तम भोग ।
अथवा पडो दु:खयोग ॥३॥
रामीं रामदास मानिला ।
देह दु:खावेगळा झाला ॥४॥
॥२॥
आम्ही मोक्षलक्ष्मीवंत ।
भवदारिद्य कैंचें तेथ ॥१॥
श्रीपतीचे परिजन ।
आम्ही स्वानंदसंपन्न ॥२॥
समाधान तें सभाग्य ।
असमाधान तें अभाग्य ॥३॥
रामीं रामदासीं देव ।
सख्यासहित स्वानुभव ॥४॥
॥३॥
मोक्षश्री ते आम्हांपाशीं ।
द्रव्यसिद्धि जिच्या दासी ॥१॥
आम्ही परमार्थ-संपन्न ।
अर्थ काय परिच्छिन्न ॥२॥
रामीं रामदास्यभाग्य ।
चढतें वाढतें वैराग्य ॥३॥
॥४॥
समर्थाचे दरिद्री सुत ।
त्यांचे करणे विपरींत ॥१॥
परी समर्थ लक्षण ।
सर्व काळ समाधान ॥२॥
समर्थाच्या विद्येलागीं ।
मधुकरी मागे जगीं ॥३॥
तैसें रामीं गमदासी ।
ब्रह्मविद्येच्या सायासीं ॥४॥
॥ अभंगसंख्या ॥१५॥