आदिशङ्कराचार्यपूजाविधिः - शंखपूजा

(कलशोदकेन भूर्भुवस्सुवरोऽमिति शंखं प्रक्षाळ्य 
चक्रमुद्रां प्रदर्श्य गायत्र्या दक्षिणामूर्तिमूलेन च शंखं
कलशजलेनापूर्य धेनुमुद्रां प्रदर्श्य परिमलद्रव्याणि
निक्षिप्य गन्धाक्षतपत्रपुष्पैः समभ्यर्चयेत्)
शंखमूले ब्रह्मणे नमः ।
शंखमध्ये जनार्दनाय नमः ।
शंखाग्रे चन्द्रशेखराय नमः ॥
(शंखं स्पृष्ट्वा)
शंखं चन्द्रार्कदैवत्यं मध्ये वरुणसंयुतम् ।
पृष्ठे प्रजापतिश्चैव अग्रे गङ्गा सरस्वती ॥
त्रैलोक्ये यानि तीर्थानि वासुदेवस्य चाज्ञया ।
शंखे तिष्ठन्ति विप्रेन्द्राः तस्माcछंखं प्रपूजयेत् ॥
त्वं पुरा सागरोत्पन्नः विष्णुना विधृतः करे ।
पूजितः सर्वदेवैश्च पाञ्चजन्य नमोऽस्तुते ॥
गर्भा देवारिनारीणां विशीर्यन्ते सहस्रधा ।
तव नादेन पाताले पाञ्चजन्य नमोऽस्तुते ॥
दर्शनादेव शंखस्य किं पुनः स्पर्शनेन तु ।
विलयं यान्ति पापानि हिमवद्भास्करोदये ॥
नत्वा शंखं करे स्पृष्ट्वा मन्त्रैरेतस्तु वैष्णवैः ।
यः स्नापयति गोविन्दं तस्य पुण्यमनन्तकम् ॥
शंखमध्यस्थितं तोयं भ्रामितं केशवोपरि ।
अङ्गलग्नं मनुष्याणां ब्रह्महत्यायुतं दहेत् ॥
ॐ पाञ्चजन्याय विद्महे पावमानाय धीमहि तन्नः शंखः प्रचोदयात् ॥
(इति शंखगायत्रीं दशवारं जपित्वा शंखोदकेन किञ्चित्
कलशे निक्षिप्य देवस्यार्घ्यं दत्वा शंखोदकेन
पूजाद्रव्याणि आत्मानं च प्रोक्ष्य शेषं विसृज्य पुनः
शंखमापूर्य गन्धादिभिरभ्यर्च्य देवस्य दक्षिणदिग्भागे स्थापयेत्)