गुरूचरित्र - छत्तिसाव्या अध्यायांतील एक मोठें न्यून

आचमनाचा विधि सांगतांना केशवादि २४ नामांचा उच्चार करिते वेळीं कुठल्या नामानें काय काय करावें, कुठे कुठे हस्तस्पर्श करावा हें सांगितले आहे. पण या २४ नामांपैकी (ओंव्या १६० नंतर) अनिरुद्ध, पुरुषोत्तम, अधोक्षज, नारसिंह व जनार्दन हीं पांच नामें अजिबात गळून गेलीं आहेत ! कोणत्याही छापी व कडगंची शिवाय इतर कुठल्याही लेखी प्रतींत तीं नाहींत ! मला मिळालेल्या सर्व लेखी प्रतींत पाहिले व ज्यांच्या ज्यांच्याकडे जुन्या लेखी प्रति असल्याचे कळले त्यांना त्यांना पत्रें पाठवून विचारलें. सर्वांकडून नकाराचेच उत्तर आलें ! याचप्रमाणें दुसरें एक न्यून सर्वत्र होते तें हें कीं दिपबाळीच्या दिवशीं (आश्विन कृ. १४ ला) यमाचे नांवें तर्पण करावें म्हणून सांगितले आहे. त्यांत यमाचीं नांवें १४ प्रसिद्ध आहेत; पण आजपर्यंतच्या सर्व प्रतींमधून १३ नांवांचाच उल्लेख आहे ! दड्डी प्रतींत मात्र चतुर्दश नांवांचा उल्लेख मिळाला. तो पाठ तेथे दिला असून त्यावर धर्मसिंधूमधील टीप-तर्पण करतांना प्रत्येक नामाला चतुर्थी विभक्ति लावून पुढे 'नमः' म्हणून त्यानंतर 'तर्पयामि' म्हणावयाचे ही विस्तारानें दिली आहे (पृ. ४४८). याप्रमाणें शक्य तितकें करून कोठें न्यून राहूं नये असा यथामति प्रयत्न केला आहे.