अध्याय ६३ वा - आरंभ

श्रीकृष्णपरमात्मने नमः ।
जय जगदीशा जगन्मया । अगम्य अगोचर अद्वया । अभेदबोधें समरसतया । सुलभ सदया सदूपा ॥१॥
तवपदभजनप्रसादलब्ध । आज्ञेवरोनि दशमस्कंध । बासष्टी अध्यायपर्यंत विशद । कृत हरिवरदाव्याख्यान ॥२॥
तेथ अनिरुद्धें भोगिली उपा । तेणें बाण चढला द्वेषा । समरीं घालूनि नागपाशा । यादववत्सा बांधिलें ॥३॥
यावरी त्रिषष्टितमाध्यायीं । शोणितपुरा शेषशायी । जाईल सोडवणे लवलाही । युद्ध ते ठायीं होईल ॥४॥
तेथ शंकरा जाणिजेल हरि । बाणबाहूंचें खंडन समरीं । करूनि अनिरुद्ध सह नोवरी । द्वारकापुरीं प्रवेशती ॥५॥
इतुकी कथा ये अध्यायीं । परिक्षितीचे श्रवणालयीं । शुकें कथिली ते मुनिसमुदायीं । शौनकसत्रीं सूत वदे ॥६॥