चन्द्रात्प्रथमगः सौम्यः सुखरुपं विना नरः ।
दुष्टभाषी मतिभ्रंशी स्थानभ्रष्टो दिनेदिने ॥१॥
चन्द्राद्वितीयगः सौम्यो धनधान्यसमाकुलः ।
गृहबन्धुधनप्राप्तिः शीतरोगैर्विनश्यति ॥२॥
चन्द्रात्सहजगः सौम्यः कुरुते चार्थसम्पदः ।
राज्यलाभो भवेत्तस्य महतां सङ्गमो ध्रुवम् ॥३॥
चन्द्राच्चतुर्थगः सौम्यः सर्वदा सुखकारकः ।
मातृपक्षे महालाभः सुखं जीवति मानवः ॥४॥
चन्द्रात्पञ्चमगः सौम्यो बुद्धिमांश्च विचक्षणः ।
रुपवांश्च महाकामी कुवाक्यं धारयेन्नरः ॥५॥
चन्द्रात्पञ्चमगः सौम्यः कृपणः कातरो भवेत् ।
विवादे च महाभीरु रोमशो दीर्घलोचनः ॥६॥
चन्द्रात्सप्तमगः सौम्यः स्त्रीणां च वशगो नरः ।
कृपणश्च धनाढ्यश्च बह्वायुश्च भविष्यति ॥७॥
चन्द्रादष्टमगे सौम्ये देहे शीतो भविष्यति ।
राजमध्ये प्रसिद्धश्च शत्रूणां च भयंकरः ॥८॥
चन्द्रान्नवमगः सौम्यः स्वधर्मस्य विरोधकः ।
अन्यधर्मरतः पुंसो विरोधी दारुणो भवेत् ॥९॥
चन्द्राद्दशमगः सौम्यो राजयोगी नरः सदा ।
कर्मराशौ यदा चन्द्रः कुटुम्बे नायको भवेत् ॥१०॥
चन्द्रादेकादशे सौम्यो लाभकारी पदेपदे ।
वर्ष एकादशे पुंसः पाणिग्राहो भविष्यति ॥११॥
चन्द्राद्वादशगः सौम्यः सर्वदा कृपणो भवेत् ।
तत्सुतस्य जयो नास्ति पराजयं लभेद्दिने ॥१२॥