क्रूरसङ्गो धनैर्हीनः कुलसन्तापकारकः ।
व्यसनासक्तचित्तश्च प्रतिपत्तिथिजो नरः ॥१॥
परदाररतो नित्यं सत्यशौचविवर्जितः ।
तस्करः स्नेहहीनश्च द्वितीयासंभवो नरः ॥२॥
अचेतनोऽतिविकलो निर्द्रव्यः पुरुषः सदा ।
परद्वेषरतो नित्यं तृतीयायां भवेन्नरः ॥३॥
महाभोगी च दाता च मित्रस्त्रेही विचक्षणः ।
धनसन्तायुक्तश्च चतुर्थ्या यदि जायते ॥४॥
व्यवहारी गुणग्राही पितृमात्रोश्च रक्षकः ।
दाता भोक्ता तनुप्रीतः पञ्चमीसंभवो नरः ॥५॥
नानादेशाभिगामी च सदा कलहकारकः ।
नित्यं जठरपोषी च षष्ठ्यां जातो भवेन्नरः ॥६॥
अल्पतोषी च तेजस्वी सौभाग्यगुणसंयुतः ।
पुत्रवान् धनसंपन्नः सप्तम्यां जायते नरः ॥७॥
धर्मिष्ठः सत्यवादी च दाता भोक्ता च वत्सलः ।
गुणज्ञः सर्वकार्यज्ञो ह्यष्टमीसंभवो नरः ॥८॥
देवताराधकः पुत्री धनस्त्रीसक्तमानसः ॥
शास्त्राभ्यासरतो नित्यं नवम्यां जायते यदि ॥९॥
दशम्यां धर्माधर्मज्ञो देवसेवी च याजकः ।
तेजस्वी सौख्यसंयुक्तो जायते मानवः सदा ॥१०॥
अल्पतोषी नरेन्द्रस्य गेहगामी शुचिर्भवेत् ।
धनी पुत्री भवेद्धीमानेकादश्यां भवेन्नरः ॥११॥
चपलश्चपलज्ञानी सदा क्षीणवपुः स्मृतः ।
देशभ्रमणशीलश्च द्वादशीजातको भवेत् ॥१२॥
महासिद्धो महाप्राज्ञः शास्त्राभ्यासी जितेन्द्रियः ।
परकार्यरतो नित्यं त्रयोदश्यां यदा भवेत् ॥१३॥
धनाढ्यो धर्मशीलश्च शूरः सद्वाक्यपालकः ।
राजमान्यो यशस्वी च चतुर्दश्यां यदा भवेत् ॥१४॥
श्रीमांश्च मतिमांश्चापि महाभोजनलालसः ।
उद्यतः परदारेषु ह्यासक्तः पूर्णिमाभवः ॥१५॥
स्थिरारम्भः परद्वेषी वक्रो मूर्खः पराक्रमी ।
मूढमन्त्री च सज्ञानोप्यमावास्याभवो नरः ॥१६॥