तूं ये गे, ये गे, ये, ये सजणे !
तनमनधनजनसदन पाहती वाट तुझी गे सखये ! ध्रु
विशाल माझें मंदिर अभिनव,
गजांतलक्ष्मी, अपार वैभव,
जों न रुणझुणे तव कंकणरव,
करविहीन जणुं विलयें ! १
सत्याचे पोकळ डोलारे,
सौंदर्याचे हे द्व्हारे,
देवाविण देउळ जणुं सारें !
करिं आरोहण सदये ! २
फळें, फुलें, रवि, शशि, नक्षत्रें,
तुजविण सारीं असार चित्रें !
येइं मंगले, शुभे पवित्रे,
प्राण वितरिं शुभ समयें. ३
ये ये तूं यक्षाची कांडी,
स्पर्शुनि जगिं या जीवन सांडी,
पाप अमंगल तिमिरा काढीं,
पसर कांति निज उदयें. ४
तूं मंगल, तूं सुख ! गे तुजविण
भुताटकीची माया त्रिभुवन,
खाया धावे मज आ वासुन,
येइ, मिळूं दे ह्रदयें ! ५