फस्त करी भक्षुनिया सर्व धान्यराशिं हा,
हडुकास्तव वसवस ये, झुंजे इतरांशिं हा. ध्रु०
त्रिभुवनही या न पुरे, खादाडचि हा गिधाड,
कळवळतो वखवखला बापुडा उपाशि हा. १
गिळि अपुलें, गिळि परकें; खाच ती तरी भरे न,
शांतीच्या वर बता, बोंबले अधाशि हा. २
परमुलुखा जाळि, पोळि; लाखांचे खून करी;
न्यायाचा वर तोरा; चोर चढवि फाशिं हा. ३
शास्त्रतटीं तोफ घोर फडशा करि बंधूंचा !
विश्वबंधुता खरि ही रक्षी दुबळ्यांशि हा ! ४
मातिंत राबोनि गरिब धान्याचे रचिति ढीग;
भक्षुनि रक्षक निरिच्छ बोका संन्यासि हा ! ५
धन्य तुझी धर्मात्म्या ! पसरे हा जगड्व्याळ !
चिरडी हा पायिं दीन, उन्नति करि खाशि हा ! ६