TransLiteral Foundation
Don't follow traditions blindly or don't assume a superstition either.
Don't be intentionally ignorant. Ask us!! Make Informed Religious Decisions!!
मराठी मुख्य सूची|मराठी साहित्य|गाणी व कविता|भा. रा. तांबे|संग्रह ३|
ते कांत यापुढें !

ते कांत यापुढें !

भा.रा.तांबे यांच्या कविता अत्यंत हळुवार असून त्या मनाला भिडतात


ते कांत यापुढें !

कुणि कसें म्हणा, कुणि करा हवें ते आतां

तें कांत यापुढें, मीहि तयांची कांता.

कुणि म्हणाच पापिण, म्हणाच कुलटा आतां,

तो एक जाणतो मला, माझिया नाथा. ध्रु०

कुणि म्हणा, भाळलें वृथा बाह्य रूपाला,

कुणि म्हणा, बळी मी पडलें तारुण्याला,

कुणि म्हणा, सोडिली लाज, सोडिली माया,

कुणि म्हणा, टाकिली भीति, दूषिली काया,

कुणि म्हणा, लाविला कलंक कुलशीलाला,

कुणि म्हणा, फासलें काळें चारित्र्याला,

कुणि म्हणा, टाकिला देव, टाकिली नीती,

कुणि म्हणा, लाविला हरताळचि शास्त्राला,

तो जुलूम तुमचा, आग लागुं दे त्याला !

जग रुसोच रुसलें, रुसो न परि तो त्राता ! ते० १

कुणि म्हणाच, मारूं, म्हणा छळूं दोघांला,

कुणि म्हणाच लावुं आग घरादारांला,

कुणि म्हणा, पेटवूं वैरहि, साधूं दावा,

कुणि म्हणा, साधुनी संधी घालूं घाला;

घ्या हातिं पाजळुनि हवी तशी तरवार,

या पडा तुटोनी ! करा हवे ते वार !

त्या दयाघनाची करुणा चिल्खत भारी,

ह्या सत्प्रीतीवर बोथटतिल तल्वारी.

आकाश कोसळो, उलो पृथ्वि या काळीं,

जी गोष्ट झालि ती आतां झाली, झाली !

मज मरण येउ, हरि सुखी राख परि नाथा ! ते० २

कुणि कसेंहि समजो, करोहि छळ या काळीं,

कुणि गांजो भाजो अमुचाही हरि वाली !

पति तुम्हीच निजपदिं हरि, जरी बोलविले

हे भ्रतार दुसरे तुम्हींच ना अर्पियले ?

आज्ञेविण तुमच्या हलेल का हो पान ?

मायेविण तुमच्या जगेल का हो कोण ?

तुम्हि सर्वसाक्ष, मग म्हणोच जग हें कांहीं,

तुम्हि 'होय' म्हणा; शास्त्राची पर्वा नाहीं !

मज माझें काळिज देतें देवा, ग्वाही,

निष्पाप असें मी, कुणी म्हणो हें कांहीं.

मग लाज तुम्हांला दीन जनांच्या नाथा ! ते० ३

Translation - भाषांतर
N/A

कवी - भा. रा. तांबे

जाति - भूपति

ठिकाण - लष्कर-ग्वाल्हेर

दिनांक - १३ सप्टेंबर १९२६


Last Updated : 2012-10-11T13:14:45.9830000

Comments | अभिप्राय

Comments written here will be public after appropriate moderation.
Like us on Facebook to send us a private message.

technological

  • तंत्रविद्याविषयक, तंत्रशास्त्रविषयक 
  • (resulting from improvement in technical processes that increases the productivity of machines and eleminates manual operations etc.) तंत्रजन्य 
  • (as technical) तांत्रिक 
  • तंत्रविद्याविषयक 
More meanings
RANDOM WORD

Did you know?

अंत्येष्टी संस्कारात और्द्ध्वदेहिक विधि काय असतो ?
Category : Hindu - Traditions
RANDOM QUESTION
Don't follow traditions blindly or ignore them. Don't assume a superstition either. Don't be intentionally ignorant. Ask us!!
Hindu customs are all about Symbolism. Let us tell you the thought behind those traditions.
Make Informed Religious decisions.

Featured site

Ved - Puran
Ved and Puran in audio format.