दीपप्रकाश - आभार

सकलतीर्थ श्रीसद्गुरूसमर्थ योगीराज भगवान माधवनाथ महाराजकी जय

सद्गुरु प्रार्थना - भुजंगप्रयातवृत्त :-

नसें ज्ञान वैराग्य कांहींच आंगी । नसे भक्तिचा लेशही अंगरंगी ॥
कसा वाजवूं दिव्य चारित्र्य - डंका । समर्था ! तरी होइ तूं पाठिराखा ॥१॥
न ठावें मुळीं शास्त्र वेदान्त योग । कळेना आकळूं ध्यान - योग ॥
कशी लावुं मी शून्यरूपी पताका । समर्था ! तरी होइ तूं पाठिराखा ॥२॥
रुचेना मनालागि एकांतवास । भवाचें वनींही फिरायास हौस ॥
सदा वाटते भीति चित्तास शंका । समर्था ! तरी होइ तूं पाठिराखा ॥३॥
स्वनेत्रीं सदा माधवा ! तूं वसावें ! तुझें रूप सर्वांतरीं म्यां बघावें ॥
तुझ्या रंगणीं रंगवीं एकमेकां । समर्था ! तरी होइ तूं पाठिराखा ॥४॥
कृपा - माधुरीचे बहू गोड प्याले । भरोनी मुखीं लाविले हो दयाळे ॥
करोनी मुका बोलका दे अवांका । खरा जाहला नाथजी पाठिराखा ॥५॥

। श्रीसद्गुरूसमर्थ भगवान श्रीमाधवनाथायनमः ।