चतुर्थ पटल - महामुद्राकथनम्

महामुद्रां प्रवक्ष्यामि तन्त्रेsस्मिन्मम वल्लभे ।
यां प्राप्य सिद्धा: सिद्धिं च कपिलाद्या: पुरागता: ॥२६॥

अपसध्येन संपीड्य पादमूलेन सादरम् ।
गुरूपदेशतो योनिं गुदमेढ्रान्तरालगाम् ॥२७॥

सव्यं प्रसारितं पादं धृत्वा पाणियुगेन वै ।
नवद्वाराणि संयम्य चिबुकं हृदयोपरि ॥२८॥

चित्तं चित्तपथे दत्त्वा प्रभवेद्वायुसाधनम् ।
महामुद्रा भवेदेषा सर्वतन्त्रेषु गोपिता ॥२९॥

वामाङ्गेन समभ्यस्य दक्षाङ्गेनाभ्यसेत्पुन: ।
प्राणायामं समं कृत्वा योगी नियतमानस: ॥३०॥

अनेन विधिना योगी मन्दभाग्योsपि सिध्यति ।
सर्वासामेव नाडीनां चालनं बिन्दुमारणम् ॥३१॥

जीवनं तु कषायस्य पातकानां विनाशनम् ।
कुण्डलीतापनं वायोर्ब्रह्मरन्ध्रप्रवेशनम् ॥३२॥

सर्वरोगोपशमनं जठराग्निविवर्धनम् ।
वपुषा कान्तिममलां जरामृत्युनिनाशनम् ॥३३॥

वांछितार्थफ़लंसौखमिंद्रियाणाञ्च मारणम् ।
एतदुक्तानि सर्वाणि योगारूढस्य योगिन: ।
भवेदभ्यासतोsवश्यं नात्र कार्या विचारणा ॥३४॥

गोपनीया प्रयत्नेन मुद्रेयं सुरपूजिते ।
यान्तु प्राप्य भवाम्भोधे: पारं गच्छन्ति योगिन: ॥३५॥

मुद्रा कामदुधा ह्येषा साधकानां मयोदिता ।
गुप्ताचारेण कर्तव्या न देया यस्य कस्यचित् ॥३६॥