श्री स्वामी समर्थ - भज मन स्वामि नाम

भज मन स्वामि नाम सुखदायी
दु:ख आपदा दूर कराया
शरण गुरूला जाई

जीवन आहे हे क्षणभंगुर
वृथा कासया हे अवडंबर
दूर करित अभिमान मनीचा
आत्मबोध तू घेई
भज मन स्वामि नाम सुखदायी

दिन-रातीला दु:ख जागते
सोसायचे बळ ना उरते
हताश होता मात्र सदोदित
आत्मवंचना होई
भज मन स्वामि नाम सुखदायी

लोभ प्रलोभन स्वार्थच केवळ
आभासचे फसवे मृगजळ
मार्ग चिरंतन मोक्ष सुखाचा
लाभे प्रभुच्या  पायी
भज मन स्वामि नाम सुखदायी

एकचित हो नामस्मरणी
परम सुखाची ही पुष्करिणी
नामापरते नाही साधन
तल्लिन त्यातच होई
भज मन स्वामि नाम सुखदायी