बाळसंतोष (चिंतामणमहाराजांचा)
मोरेश्वरा तूं मज भेटलासी दाता तत्वता ॥
दान देईं तूं समर्था ॥ बाबा बाळ संतोष ॥
करुणा भाकितों येकदंता ॥ बाबा बाळ संतोष ॥१॥
दान मागतों तुज मी एक ॥
चरणीं (पायीं) ठेवी मज निकट ॥बाबा बाळ संतोष ॥
आणिका अर्थी रे नाहीं काज ॥ बाबा बाळ संतोष ॥२॥
तूं म्हणसील देईन धन संपत्ती ॥
नलगे मज रे धन प्राप्ती ॥ बाबा बाळ संतोष ॥
हृदयीं राहे रे गणपती ॥ बाबा बाळ० ॥३॥
तुज वाटलें दिधलें पुत्र कलत्र ॥
याचें नलगे रे मज सुख ॥ बाबा बाळसंतोष ॥
याच्या संगें रे दुःख प्राप्त ॥ बाबा बाळ संतोष ॥४॥
प्राप्ति गतीच्या ठांई न येती कोणी कामा ॥
शरण आलों रे तुझीया नामा ॥बाबा बा०॥
विटलों विषय (विषयाच्या) सुखास ॥ बाबा बा० ॥५॥
लक्ष चौर्यासीं योनी हिंडोनी ॥ कष्ट झाले रे माझ्या देहीं ॥बाबा बा०॥
तेणें दुःख रे राही चरणीं ॥ बाब बा०॥६॥
मागणें नाहीं तुज कांहीं उत्कट ॥ उद्धरावे रे वेगीं भक्त ॥ बाबा बा०॥
दाना उशीर जाला बहुत ॥ बाबा बा०॥७॥
तुझें दान गा जयासीं ॥ चुकले गर्भ रे रहिवासासीं ॥बाबा बा०॥
त्याच्या झाल्या रे पुण्यराशी ॥ बाबा बा०॥८॥
प्राप्ति केली तुझी म्यां पुरवी ॥ विनवी चिंतामन गोसावी ॥बाबा बा०॥
कृपा (दया) स्नेह रे भक्ता पाहे ॥ बाबा बा०॥
बाबा बाळ संतोष ॥बाबा बाळ संतोष॥ बाबा बाळ संतोष ॥
कृपा (दया) स्नेह रे भक्ता पाहे ॥बाबा बाळसंतोष ॥९॥