१.
येई पांडुरंगा कृपाळू उदारा । दीनाच्या दातारा मायबापा ॥१॥
नको वेळ दावूं धावोनिया येई । कृपादृष्टी पाहीं मज दीना ॥२॥
तुझ्या भेटीसाठीं जीव कासावीस । पुरवीं तूं आस नारायणा ॥३॥
मज पामराची येऊं दे करुणा । रुक्मिणीरमणा जीवलगा ॥४॥
अनंता धांवोनी त्वरें घालि उडी । सुताची आवडी जाणूनियां ॥५॥
२.
देवा संसारीं पावलो मी शीण । यातना दारुण तडातडी ॥१॥
म्हणूनिया धांवा मांडिला केशवा । येई रमाधवा तारीं मज ॥२॥
भवाब्धि सागरीं जातसे पाहून । जळचरें दारुण तोडिताती ॥३॥
कोणी सोडविता मज येथें नाहीं । तुजवीण पाही तया सिंधु ॥४॥
अनंता दयाळा त्वरें ये धांवत । कासावीस सुत शीण पावें ॥५॥
३.
तुम्हांसी शरण जालो जीवें भावें । दीनांलागी पावें विठ्ठले तूं ॥१॥
उदारांचा राणा होसी कृपासिंधु । आणि दीनबंधु नाम तूझें ॥२॥
ऐसिया नामाची ऐकूनियां कीर्ति । शरण कमळापति जालो तूज ॥३॥
अन्यायी अपराधी पतित मी खरा । तुम्हीं दोनोद्धारा आपंगावें ॥४॥
अनंता दयाळा सुता देई भेटी । लागलीसे दिठी तुम्हांकडे ॥५॥
४.
मायबाप धणी विठ्ठल तूं होसी । तुजविण आम्हांसी कोण असे ? ॥१॥
बंधु-बहिणी आप्त सोयरा सांगाती । तुजविण कमळापति नाहीं दूजे ॥२॥
तूंचि गणगोत इष्टमित्र सखा । होसी पाठिराखा विठ्ठला तूं ॥३॥
विठ्ठला तूं तारु सकळ आधारु । दीनाचा दातारु प्राण विठो ॥४॥
विठ्ठला अनंता, कृपाळा गुणवंता । भेटि देई सुता आपुलिया ॥५॥
५.
भेटीसाठीं जीव पिसा । कधीं आशा पुरवीसी ॥१॥
धांव घाली ऊठाऊठीं । देई भेटी दीनांते ॥२॥
तळमळी मन । होतो प्राण घाबरा ॥३॥
मागें पुढें वाट पाहे । करुणा गा ये पुढती ॥४॥
सुत दिसे दीनवाणा । येऊं दे करुणा अनंता ॥५॥
६.
सापडलो आडचणी । किती काचणी सांगावी ? ॥१॥
कृपावंत विठ्ठराया । दावी पायां झडकरी ॥२॥
वोंगळ ते पसरले । काय जळे प्राणेंसी ॥३॥
विखाराचे बिळीं । सुख काळीं आसेना ॥४॥
अनंता हा सुत । झाला ग्रस्त सोडवी ॥५॥
७.
कृपाळु बा पांडुरंगा । भेटी देई आज सगां ॥१॥
माझें आतां समाधान । तुझ्यावीन करील कोण ? ॥२॥
होसी अनाथांचा नाथ । माझी परिसावी मात ॥३॥
माझी येऊं द्या करुणा । दीनबंधु नारायणा ॥४॥
पाहे कृपाळु अनंता । दुजा ठाव नाहीं सुता ॥५॥
८.
धुंडिता हें त्रिभुवन । नाहीं सखा तुज विण ॥१॥
सर्व सांगाती सुखाचे । कोणी नाहीं निदानीचे ॥२॥
वर्ण जाणोनी मानसीं । शरण येतो हृषीकेषी ॥३॥
पतितपावन विश्वंभरा । काय पाहसी दातारा ? ॥४॥
स्वामी कृपाळु अनंता । दुजा ठाव नाहीं सुता ॥५॥
९.
बहु पीडलो संकटीं । धाव घाली जगजेठी ॥१॥
आतां न लावा उशीर । वाट पाहे मी पामर ॥२॥
येई येई दयाघना । भेटी देई वेगीं दीना ॥३॥
चिंतानळे ग्रस्त झालो । तुज काकुळती आलो ॥४॥
काय पाहसी अनंता । धीर धरवे ना सुता ॥५॥
१०.
किती वाट पाहूं तुझिया भेटीची । करुणा दीनाची कां गा न ये ? ॥१॥
काय तुज झालें लागला उशीर । मज तो आतां धीर धरवेना ? ॥२॥
कवणीया ठायां गेला देवराया । सांडोनिया माया माझी सोय ? ॥३॥
विसर पडला माझा नारायणा । किंवा हरी कोणा भुललासी ॥४॥
अनंता दयाळा नेणवेची कांहीं । सुत चिंताडोहीं बुडलासे ॥५॥
११.
देवा पतितपावना । दीनबंधु नारायणा ।
मज अंगिकारीं दीना । विज्ञापना पायासी ॥१॥
नका उपेक्षू दीनासी । कृपा करावी हृषीकेशी ।
तुजवीण गा उदासी । दिवानिशी दयाळा ॥२॥
नको पाहूं गुणदोष । झालो चरणीचा दास ।
तोडी देवा भवपाश । करी नाश दुरिताचा ॥३॥
त्रिविध तापे मी तापलो । जीवीं बहुत पोळलो ।
तुम्हां काकुळती आलो । वायां गेलो न करी हें ॥४॥
धाव घाली रमाकांता । माझ्या कृपाळु अनंता ॥
भेटि देवोनियां सुता । नीरसी चिंता आतांचि ॥५॥