संस्कृत सूची|संस्कृत साहित्य|संहिता|गर्ग संहिता|गोलोकखण्डः| अध्यायः १२ गोलोकखण्डः अध्यायः ०१ अध्यायः ०२ अध्यायः ०३ अध्यायः ०४ अध्यायः ०५ अध्यायः ०६ अध्यायः ०७ अध्यायः ०८ अध्यायः ०९ अध्यायः १० अध्यायः ११ अध्यायः १२ अध्यायः १३ अध्यायः १४ अध्यायः १५ अध्यायः १६ अध्यायः १७ अध्यायः १८ अध्यायः १९ अध्यायः २० गोलोकखण्डः - अध्यायः १२ गर्ग संहिता ही गर्ग मुनिंची रचना आहे. ह्या संहितेत श्रीकृष्ण आणि राधाच्या माधुर्य-भाव असलेल्या लीलांचे वर्णन आहे. Tags : gargagarga samhitasamhitaगर्गगर्ग संहितासंहिता श्रीनंदमहोत्सववर्णनं Translation - भाषांतर श्रीनारद उवाच -अथ पुत्रोत्सवं जातं श्रुत्वा नन्द उषःक्षणे ।ब्राह्मणांश्च समाहूय कारयामास मंगलम् ॥१॥सविधिं जातकं कृत्वा नन्दराजो महामनाः ।विप्रेभ्यो दक्षिणाभिश्च मुदा लक्षं गवां ददौ ॥२॥क्रोशमात्रं रत्नसानून्सुवर्णखिखरान् गिरीन् ।सरसान्सप्तधान्यानां ददौ विप्रेभ्य आनतः ॥३॥मृदंगवीणाशंखाद्या नेदुर्दुंदुभयो मुहुः ।गायकाश्च जगुर्द्वारे ननृतुर्वारयोषितः ॥४॥पताकैर्हेमकलशैर्वितानैस्तोरणैः शुभैः ।अनेकवर्णैश्चित्रैश्च बभौ श्रीनन्दमन्दिरम् ॥५॥रथ्या वीथ्यश्च देहल्यो भित्तिप्रांगणवेदिकाः ।तोलिकामंडपसभा रेजुर्गन्धिजलांबरैः ॥६॥गावः सुवर्णशृङ्ग्यश्च हेममालालसद्गलाः ।घंटामंजीरझंकारा रक्तकंबलमंडिताः ॥७॥पीतपुच्छाः सवत्साश्च तरुणीकरचिह्निताः ।हरिद्राकुंकुमैर्युक्ताः चित्रधातुविचित्रिताः ॥८॥बर्हिपुच्छैर्गन्धजलैर्वृषा धर्मदुरंधराः ।इतस्ततो विरेजुः श्रीनन्दद्वारि मनोहराः ॥९॥गोवत्सा हेममालाढ्या मुक्ताहारविराजिताः ।इतस्ततो विलंघन्तो मंजीरचरणां सिताः ॥१०॥श्रुत्वा पुत्रोत्सवं तस्य वृषभानुवरस्तथा ।कलावत्या गजारूढो नन्दमंदिरमाययौ ॥११॥नन्दा नवोपनन्दाश्च तथा षड्वृषभानवः ।नानोपायनसंयुक्ताः सर्वे तेऽपि समाययुः ॥१२॥उष्णीषोपरि मालाढ्याः पीतकंचुकशोभिताः ।बर्हगुंजाबद्धकेशा वनमालाविभूषणाः ॥१३॥वंशीधरा वेत्रहस्ताः सुपत्रतिलकार्चिताः ।बद्धवर्णाः परिकरा गोपास्तेऽपि समाययुः ॥१४॥नृत्यन्तः परिगायंतो धुन्वंतो वसनानि च ।नानोपायनसंयुक्ताः श्मश्रुलाः शिशवः परे ॥१५॥हैयंगवीनदुग्धानां दध्याज्यानां बलीन्बहून् ।नीत्वा वृद्धा यष्टिहस्ता नन्दमंदिरमाययुः ॥१६॥पुत्रोत्सवं व्रजेशस्य कथयन्तः परस्परम् ।प्रेमविह्वलभावैः स्वैरानन्दाश्रुसमाकुलाः ॥१७॥जाते पुत्रोत्सवे नन्दः स्वानंदाश्रुकुलेक्षणः ।पूजयामास तान् सर्वांस्तिलकाद्यैर्विधानतः ॥१८॥गोपा ऊचुः -हे व्रजेश्वर हे नन्द जातः पुत्रोत्सवस्तथा ।अनपत्यस्येच्छतोऽलमतः किं मंगलं परम् ॥१९॥दैवेन दर्शितं चेदं दिनं वो बहुभिर्दिनैः ।कृतकृत्याश्च भूताः स्मो दृष्ट्वा श्रीनन्दनन्दनम् ॥२०॥हे मोहनेति दुरात्तमंकं नीत्व गदिष्यसि ।यदा लालनभावेब भविता नस्तदा सुखम् ॥२१॥श्रीनन्द उवाच -भवतामाशिषः पुण्याज्जातं सौख्यमिदं शुभम् ।आज्ञावर्ती ह्यहं गोपा गोपानां व्रजवासिनाम् ॥२२॥श्रीनन्दराजसुतसंभवमद्भुतं चश्रुत्वा विसृज्य गृहकर्म तदैव गोप्यः ।तूर्णं ययुः सबलयो व्रजराजगेहा-नुद्यत्प्रमोदपरिपूरितहृन्महोऽङ्गाः ॥२३॥आनन्दमंदिरपुरात्स्वगृहोन् व्रजन्त्यःसर्वा इतस्तत उत त्वरमाव्रजन्त्यः ।यानश्लथद्वसनभूषणकेशबन्धारेजुर्नरेन्द्र पथि भूपरिमुक्तमुक्ताः ॥२४॥झंकारनूपुरनवांगदहेमचीर-मञ्जीरहारमणिकुंडलमेखलाभिः ।श्रीकंठसूत्रभुजकंकणबिंदुकाभिःपूर्णेन्दुमंडलनवद्युतिभिर्विरेजुः ॥२५॥श्रीराजिकालवणरात्रिविशेषचूर्णै-र्गोधूमसर्षपयवैः करलालनैश्च ।उत्तार्य बालकमुखोपरि चाशिषस्ताःसर्वा ददुर्नृप जगुर्जगदुर्यशोदाम् ॥२६॥गोप्य ऊचुः -साधु साधु यशोदे ते दिष्ट्या दिष्ट्या व्रजेश्वरि ।धन्या धन्या परा कुक्षिर्ययाऽयं जनितः सुतः ॥२७॥इच्छा युक्तं कृतं ते वै देवेन बहुकालतः ।रक्ष बालं पद्मनेत्रं सुस्मितं श्यामसुन्दरम् ॥२८॥श्रीयशोदा उवाच -भवदीयदयाशीर्भिर्जातः सौख्यं परं च मे ।भवतीनामपि परं दिष्ट्या भूयादतः परम् ॥२९॥हे रोहिणि महाबुद्धे पूजनं तु व्रजौकसाम् ।आगतानां सत्कुलानां यथेष्टं हीप्सितं कुरु ॥३०॥श्रीनारद उवाच -रोहिणी राजकन्याऽपि तत्करौ दानशीलिनौ ।तत्रापि नोदिता दाने ददावतिमहामनाः ॥३१॥गौरवर्णा दिव्यवासा रत्नाभरणभूषिता ।व्यचरद्रोहिणी साक्षात्पूजयंती व्रजौकसः ॥३२॥परिपूर्णतमे साक्षाच्छ्रीकृष्णे व्रजमागते ।नदत्सु नरतूर्येषु जयध्वनिरभून्महान् ॥३३॥दधिक्षीरघृतैर्गोपा गोप्यो हैयंगवैर्नवैः ।सिषिचुर्हर्षितास्तत्र जगुरुच्चैः परस्परम् ॥३४॥बहिरन्तपुरेः जाते सर्वतो दधिकर्दमे ।वृद्धाश्च स्थूलदेहाश्च पेतुर्हास्यं कृतं परैः ॥३५॥सूताः पौराणिकाः प्रोक्ता मागधा वंशशंसकाः ।वन्दिनस्त्वमलप्रज्ञाः प्रस्तावसदृशोक्तयः ॥३६॥तेभ्यो नंदो महाराजः सहस्रं गाः पृथक् पृथक् ।वासोऽलंकाररत्नानि हयेभानखिलान्ददौ ॥३७॥वन्दिभ्यो मागधेभ्यश्च सर्वेभ्यो बहुलं धनम् ।ववर्ष घनवद्गोपो नंदराजो व्रजेश्वरः ॥३८॥निधिः सिद्धिश्च वृद्धिश्च भुक्तिर्मुक्तिर्गृहे गृहे ।वीथ्यां वीथ्यां लुठन्तीव तदिच्छा कस्यचिन्न हि ॥३९॥सनत्कुमारः कपिलः शुकव्यासादिभिः सह ।हंसदत्तपुलस्त्याद्यैर्मया ब्रह्मा जगाम ह ॥४०॥हंसारूढो हेमवर्णो मुकुटी कुण्डली स्फुरन् ।चतुर्मुखो वेदकर्ता द्योतयन्मंडलं दिशाम् ॥४१॥तथा तमनु भुताढ्यो वृषारूढो महेश्वरः ।रथारूढो रविः साक्षात्गजारूढः पुरंदरः ॥४२॥वायुश्च खंजनारूढो यमो महिषवाहनः ।धनदः पुष्पकारूढो मृगारूढः क्षपेश्वरः ॥४३॥अजारूढो वीतिहोत्रो वरुणो मकरस्थितः ।मयूरस्थः कार्तिकेयो भारती हंसवाहिनी ॥४४॥लक्ष्मी च गरुडारूढा दुर्गाख्या सिंहवाहिनी ।गोरूपधारिणी पृथ्वी विमानस्था समाययौ ॥४५॥दोलारूढा दिव्यवर्णा मुख्याः षोडशमातृकाः ।षष्ठी च शिबिकारूढा खड्गिनी यष्टिधारिणी ॥४६॥मंगलो वानरारूढो भासारूढो बुधः स्मृतः ।गीष्पतिः कृष्णसारस्थः शुक्रो गवयवाहनः ॥४७॥शनिश्च मकरारूढ उष्ट्रस्थः सिंहिकासुतः ।कोटिबालार्कसंकाश आययौ नन्दमन्दिरम् ॥४८॥कोलाहलसमायुक्तं गोपगोपीगणाकुलम् ।नन्दमन्दिरमभ्येत्य क्षणं स्थित्वा ययुः सुराः ॥४९॥परिपूर्णतमं साक्षाच्छ्रीकृष्णं बालरूपिणम् ।नत्वा दृष्ट्वा तदा देवाश्चक्रुस्तस्य स्तुतिं पराम् ॥५०॥वीक्ष्य कृष्णं तदा देवा ब्रह्माद्या ऋषिभिः सह ।स्वधामानि ययुः सर्वे हर्षिताः प्रेमविह्वलाः ॥५१॥इति श्रीगर्गसंहितायां गोलोकखण्डे नारदबहुलाश्वसंवादे श्रीनंदमहोत्सववर्णनं नाम द्वादशोऽध्यायः ॥१२॥ N/A References : N/A Last Updated : May 19, 2021 Comments | अभिप्राय Comments written here will be public after appropriate moderation. Like us on Facebook to send us a private message. TOP