अष्टक चिन्मयानंदाचें

( वृत्त : भुजंगप्रयात )
नमो मोरया शारदा मोरयानी ।
गुरु सच्चिदानंद कैवल्यदानी ॥
गुरु शंकराचार्य आचार्यमाळा ।
गुरु चिन्मयानंद स्वामी दयाळा ॥१॥
दयासागरा भाग्यवंता उदारा ।
अलों आपुली कीर्ति ऐकूनि दारा ॥
अजी लाभली ही भली पुण्यवेळा ।
गुरु चिन्मयानंद स्वामी दयाळा ॥२॥
तुंची शत्रुचा शत्रु आजानबाहू ।
तुझ्यावीण मातृ - पितृ - आजा न बाहू ॥
तुंची या जगाच्या जिवाचा जिव्हाळा ।
गुरु चिन्मयानंद स्वामी दयाळा ॥३॥
रजाच्याश्रयें शत्रु साहीं तमातें ।
गमे प्रेरितां हीत आहीत मातें ॥
म्हणूनी अली भोगणें बंदिशाळा ।
गुरु चिन्मयानंद स्वामी दयाळा ॥४॥
अभीमान माझा मला काळ झाला ।
अही पाळिला झोंबला काळजाला ॥
अतां सोडवी शीघ्र वैद्या नकूळा ।
गुरु चिन्मयानंद स्वामी दयाळा ॥५॥
जरी मी अहों सर्वथा पापराशीं ।
तरी आत्मज्ञानानळें कापराशी ॥
स्वयें स्पर्शिल्या उदभवे दिव्य ज्वाळा ।
गुरु चिन्मयानंद स्वामी दयाळा ॥६॥
जरा व्याधिची लागलीसे उपाधी ।
कशाची सुषुप्ती सुखाची समाधी ॥
म्हणूनी अली भोगणें बंदिशाळा ।
गुरु चिन्मयानंद स्वामी दयाळा ॥७॥
करीना जशी व्यंग गंगा तरंगा ।
तसें घ्या उसंगा सुसंगांत रंगा ॥
अलिंगोनि लावी निजानंदिं डोळा ।
गुरु चिन्मयानंद स्वामी दयाळा ॥८॥
गुरुनाम हीं कुंडलें घोषकानीं ।
गुरुचिंतनें संसृती - दोष - कांनीं ॥
गुरु वंदनें जन्ममृत्यूसि टाळा ।
गुरु चिन्मयानंद स्वामी दयाळा ॥९॥
महोत्साव हा वद्य वैशाखमासीं ।
भरे द्वादशीचा नंद शेषाखमासीं ॥
मिळे भुक्ती मुक्ती सुखाचा सुहाळा ।
गुरु चिन्मयानंद स्वामी दयाळा ॥१०॥
कृपेची अतां तूं गुरु माउली ही ।
करी विष्णुदासावरी साउली हो ॥
धरुं ने अतां भाव पोटीं निराळा ।
गुरु चिन्मयानंद स्वामी दयाळा ॥११॥