देवता - खंडोबा

७०

देव शिवाचा अवतार । जाउनि बसला गडावर ॥१॥

एक निळ्या घोड्यावर । एक ढवळ्या नंदीवर ॥२॥

एका विभूतीचें लेणें । एका भंडार -भूषणें ॥३॥

रामदासीं एक जाला । भेदभाव तो उडाला ॥४॥

७१

निळ्या घोडियाचा स्वार । वरी उधळि भंडार । हातीं खंडा घेऊनी मार । करीत आहे दुर्जना ॥१॥

बेड्या लोहाच्या तुटती । खोडे मध्येंचि फुटती । किती बगाडें लागती । गळ घेती टोंचोनी ॥२॥

भक्तां प्रसन्न होतसे । भाग्य संपत्ति देतसे । दास म्हणे ऐसे कैसे । भगवान नवस पुरविती ॥३॥