६
रत्नजडित सिंहासन । वरी शोभे रघुनंदन ॥१॥
वामांकीं ते सीताबाई । जगज्जननी माझी आई ॥२॥
पश्चाद्भागीं लक्षुमण । पुढें अंजनीनंदन ॥३॥
भरत शत्रुघन भाई । चामरें ढाळिती दोन्ही बाहीं ॥४॥
नळनीळ जांबुवंत । अंगद सुग्रीव बिभीषण भक्त ॥५॥
देहबुद्धि नेणों कांहीं । दास अंकित रामापायीं ॥६॥
७
ध्यान लागलें रामाचें । दुःख हरलें जन्माचें ॥१॥
राम पदांबुजावरी । वृत्ति गुंतली मधुकरी ॥२॥
रामवदनमयंकीं । चक्षुचकोर जाले सुखी ॥३॥
तनुमेघश्याम मेळे । चित्तचातक निवाले ॥४॥
कीर्तिसुगंधतरुवरी । कुजे कोकिळा वैखरी ॥५॥
रामीरामदासस्वामी । प्रगटले अंतर्यामीं ॥६॥
८
राम सांवळा सुंदर ॥ कांसें मिरवी पितांबर ॥१॥
चरणीं ब्रीदाचा तोडर ॥ वांके वाळ्याचा गजर ॥ध्रु०॥
मुगुट किरिटी तेजाळ ॥ रत्नें वोप देती ढाळ ॥२॥
जडित रत्नें बाहूवटे ॥ बाहू दोर्दंड गोमटे ॥३॥
पदक वैजयंती माळा ॥ फांकताती राजकळा ॥४॥
भूषणमंडित रघुपती ॥ दास करितसे विनंती ॥५॥
९
तुम्ही चिंता हो मानसीं । राम शरयूतीरवासी ॥ध्रु०॥
रुप सांवळें सुंदर । ज्याला ध्यातसे शंकर ॥१॥
जडित कुंडलें श्रवणीं । राम लावण्याची खाणी ॥२॥
सूर्यवंशाचें मंडण । रामदासाचें जीवन ॥३॥
१०
मुगुट कीरीट कुंडलें । तेज रत्नांचें फांकलें ॥१॥
ऐसा राम माझे मनीं । सदा आठवें चिंतनीं ॥ध्र०॥
कीर्तिमुखें बाहूवटे । दंडीं शोभतीं गोमटे ॥२॥
जडित रत्नांचीं भूषणें । दशांगुळें वीरकंकणें ॥३॥
नाना रत्नांचें पुंजाळ । पदक वैजयंती माळ ॥४॥
कांसे शोभे सोनसळा । कटीं कटिसूत्र मेखळा ॥५॥
अंदु नेपुरांचे मेळ । वांकीं वाजती खळाळ ॥६॥
राम सर्वांगें सुंदर । चरणीं ब्रीदाचा तोडर ॥७॥
सुगंध परिमळ धूसरें । झेंपावती मधुकरें ॥८॥
गळां पुष्पांचिया माळा । वामे शोभे भूमिबाळा ॥९॥
स्वयंभ सुवर्णाची कांस । पुढें उभा रामदास ॥१०॥