५१
समचरणाचा हाचि भावो । तेथें भक्तां दावावया ठावो । उभा राहावया अभिप्रावो । भक्त खांद्यावरि घ्यावे ॥१॥
विठोबा हे आमुची जननी । भीमातीरनिवासिनी । भक्त पुंडलिका लागुनि । वैकुंठींहुनि पातली ॥२॥
श्रीवत्साचिये खूण । तें भक्ताचें कृपास्थान । आजानुबाहु यालागुन । भक्तां आलिंगन द्यावया ॥३॥
शोभे सुहास्यवदन । नाभी नाभी हें वचन । पूर्ण आकर्णनयन । अवघे भक्त पहावया ॥४॥
मुगुटीं मयूरपत्रें त्रिवळी । विटे नीट असे ठाकिली । रामदासाची माउली । भक्तांलागीं उभी असे ॥५॥
५२
कांहीं बोल रे विठ्ठला । मौन वेष कां धरिला ॥१॥
काय मागतों गांठोडी । बोलसीना धरिली गुडी ॥ध्रु०॥
आशा वैभवाची नाहीं । भिऊं नको वद कांहीं ॥२॥
नलगे मज धन दारा । वेगें लोचन उघडा ॥३॥
दास म्हणे वर पाहे । कृपा करुनि भेटावें ॥४॥
५३
सोनियाचा दिवस जाला । पांडुरंग रंगीं आला ॥१॥
मना आतां सावध होईं । प्रेमरंगीं रंगुनि राहीं ॥२॥
बोल कैसा सुपरित कांहीं । अनुसंधान विठ्ठलपायीं ॥३॥
दास म्हणे हेचि युक्ती । एक देवासी चिंतिती ॥४॥
५४
न विसंबिजे । न विसंबिजे । आमुतें पाहिजे । पांडुरंगा ॥ध्रु०॥
न विसंबीत वीट । धरिली चरणांतळीं । तेंविं दासें आपुलीं । न विसंबिजे ॥१॥
न विसंबित ह्रदयीं । धरिलें श्रीवत्सासी । तेंवि निजदासांसी । न विसंबिजे ॥२॥
रामीरामदास । विनवी पढरिराया । दासा आपुलिया । न विसंबिजे ॥३॥
५५
भाग्यें पंढरी पाहिली । दृष्टी विठ्ठलीं जडली । निपटचि लांचावली । विठ्ठल जालीसे आपण ॥१॥
नवल देखावयाचा साक्षात्कार । पहांट फुटली अनिवार । कोंदाटला विठ्ठलवीर । अवनी अंबर हारपलें ॥२॥
आजि निजबोध सोनियाचा जाला । अस्त उदय अस्ता गेला । रामीरामदास विनटला । हर्षे भरला त्रैलोक्य ॥३॥
५६
देह हे पंढरी आत्मा पंढरिराव । यात्रा महोत्साव सर्वकाळ ॥१॥
आम्ही यात्रेकरु नित्य यात्रा करुं । दर्शनीं सादरु पांडुरंग ॥२॥
भक्ती हेचि वीट भाव धरुं नीट ॥ उभा जो वरिष्ठ ब्रम्हादिकां ॥३॥
वैराग्य भीवरा ज्ञान पुंडलीक । तेथोनी सन्मुख पांडुरंग ॥४॥
निज बोधें दर्शन रामदासा जालें । यात्रेचें खुंटलें अनुसंधान ॥५॥
५७
आम्हीं देखिली पंढरी । सच्चिदानंद पैलतीरीं ॥ध्रु०॥
भाव भक्ति श्रवण मनन ॥ निदिध्यास साक्षात्कारपणें ॥१॥
चिच्छक्ति धर्मनदी । तरलों ब्रम्हास्मि बुद्धि ॥२॥
तेथिंचा अहंकार तेंचि पोंवळी । त्यजोनी प्रवेशलों राउळीं ॥३॥
रामदासीं दर्शन जालें । आत्म्या विठ्ठलातें देखिलें ॥४॥
५८
पुंडलीक म्हणिजे उभा पांडुरंग । तेंचि पांडुरंग नाम जालें ॥१॥
पांडुरंग देव पांडुरंग भक्त । पांडुरंग मुक्त श्रोते वक्ते ॥२॥
अळंकारीं हिरे जडिले पांडुरंग । पडिलें पांडुरंग तेज त्यांचें ॥३॥
पांडुरंग टिळा पांडुरंग माळा । पांडुरंग कीळा मुक्ताफळीं ॥४॥
पांडुरंग शंख पांडुरंग चक्र । पांडुरंग वस्त्रयुग्म शोभे ॥५॥
पांडुरंग नगर पांडुरंग शिखर । पांडुरंग नीर भीमानदीं ॥६॥
पांडुरंग विभव पांडुरंग भाव । पांडुरंग देव रामदासीं ॥७॥
५९
विठोबा तूं आमुचें कुळदैवत । आम्ही अनन्य शरणागत । तुझे पायीं असे चित्त । जीवीं आर्त भेटीचें ॥१॥
धांवें पावें विठो माये । उडी घालीं लवलाहें । भेटावया जीव फुटों पाहे । खंती देहीं न समाये ॥२॥
येईं उभारुनी बाहे ॥ धांव धांव विठ्ठले ॥३॥
रामदास बाहे करुणावचनीं । धांवें बाह्या पसरोनी । अश्रुं दाटले लोचनीं । आलिंगनीं पातली ॥४॥
६०
सहज बरवा सहज बरवा । सहज बरवा विठोबा माझा ॥१॥
सहज सांवळा दिगंबर । सहज कटीं करु ठेऊनि उभा ॥२॥
रामीरामदास म्हणे । सहज अनुभव तोचि जाणे ॥३॥