रूपक - घोंगडें

१.
पाटोळा तिंमलारे मजवरी घालीं कांबळें ॥ध्रु०॥
आषाढमासिचारे कैसा शीतळ वारा । वर्षतो मेहुलारे कैशा शीतल धारा ॥१॥
झिरमिर झिरमिररे कैसा वर्षतो मेहू । जाळीचें घोंगडें बा मजवर घालीं सेवू ॥२॥
प्रेमाचें भरतेंगा कैसा महापूर आला । नामया विष्णुदास केशवराजीं मिनला ॥३॥
२.
औट हात घोंगडें दिधलें हरी । पांधरलों नाहीं घणीवरी ॥१॥
माझें घोंगडें कृष्णा गा जतन करीं । नागविलें थोरीं पांचाजणीं ॥२॥
साठी तीनशें दसोडी । पदरीं औट कोडी रोमावळी ॥३॥
बहात्तर गांठी सोळा फुंदणी । घोंगदी दाटणी होत असे ॥४॥
त्निगुणी दोरिया जाणा । घोंगडें पांघरवी पंढरीराणा ॥५॥
त्यांचें घोंगडें त्यासी दिधलें । उघडें नामे भक्ती पांघरविलें ॥६॥