आरती - आरती तिसरी

( चाल : आरती भुवन )
ही आदिमाया जगदंबा । रेणुका, कुलस्वामिनी, अंबा ॥धृ०॥
जागृत करुनि निरंकारा । निर्गुण आणिलें आकारा ॥
त्रिविध गुण लावुनि संसारा । रचिला जगडंबर सारा ॥
भू, जल, तेज, गगन, वारा । बहु तत्त्वांचा परिवारा ॥
( चाल ) उत्पत्ति स्थिति संहारा । लाविले इनें विधिहरिहरा ॥
करुनि परिमाण, केलें निर्माण, जगाचे प्राण
सकळहि सृष्टि मुळारंभा ॥ रेणुका० ॥१॥
दुर्लभ जय देवासि दिला । दुर्जय महिषासुर वधिला ।
रक्तें क्षितिपट रंगविला । सहस्त्रार्जुन घट भंगियला ॥
कटकट लावुनि लंकेला । कुळासह राक्षसक्षय केला ॥
( चाल ) द्रुपदपुरि जाहली याज्ञसेनी । करुनी विरविरहित अवनी ।
उतरला भार, शौर्य आपार, लागेना पार
सुरवर मानिती आचंबा ॥ रेणुका ॥२॥
रेणु राजाची दुहिता । अति सुंदर रुप कनकलता ॥
श्रीजमदग्निची वनिता । त्रिभुवन - जन - पावन सरिता ॥
भार्गवरामाचि माता । जिचे गुण वदुं न शके धाता ॥
( चाल ) सगुणरुप सौख्याची खाणी । सकळ मुळ दुःखांची खाणी
प्रकटली धरणी, भवार्णव - तरणी, कलिमल - हरणी ।
दुर्घट संकट विटंबा ॥ रेणुका० ॥३॥
उत्तम मुळपिठ रम्यस्थळ । वसती देवऋषि सकळ ॥
वाहे अमृततुल्य जळ । प्राशितां होती श्रम सफळ ॥
बैसली सिंहासनिं अढळ । सदा सुप्रसन्न मुखकमळ ॥
( चाल ) - जोडुनि विष्णुदास पाणी, प्रार्थुनी म्हणे दीनवाणी,
दाखवी पाय, पाहसी काय, कोटि अन्याय
क्षमा करि, न करी विलंबा ॥ रेणुका० ॥४॥