डोंगर पोखरून उंदीर काढणें

मराठी वाक्संप्रदाय - वाक्यप्रचार

   १. अतिशय परिश्रम करूनहि अल्प फळ हाती येणें. मोठे अवडंबर माजवून एखादे अत्यल्प कार्य करणें. एकदा एका डोंगरातून मोठा आवाज येऊ लागला म्हणून लोक भोवती गोळा झाले व त्यांनी आत काय आहे म्हणून खणून पाहिले तो एक उंदराचे बिटुकले हळूच बाहेर पडले. २. इसापनीतीत एक गोष्ट आहे. एकदा एका डोंगरास प्रसृतिवेदना होऊ लागल्यामुळे तो मोठमोठ्याने ओरडू लागला. तेव्हा सभोवतालचे सर्व लोक तो चमत्कार पाहण्यासाठी गोळा झाले व डोंगराच्या पोटातून केवढे अजस्त्र मूल बाहेर पडते याची उत्सुकतेने वाट पाहूं लागले. अखेरीस हळूच एक उंदराचे पिल्लू बाहेर पडले! याप्रमाणें अल्प गोष्टीकरितां भयंकर गाजावाजा झाला म्हणजे म्हणतात.