परिटा येशिल कधि परतून? ॥धृ०॥
कोट रेशमी लग्नामधला मानेवर उसवून!
उरल्या सुरल्या गुंड्यांचीही वासलात लावून!
बारिकसारिक हातरुमाला हातोहात उडवून!
सदर्यांची या इस्तरिने तव चाळण पार करून!
खमिसांची ही धिरडी खरपुस भट्टिमधे परतून!
तिच्या भरजरी पैठणिची या मच्छरदाणी करून!
गावातिल कपड्यांची सगळ्या गल्लत छान करून!
रुमाल जरिचे आणि उपरणी महिनाभर नेसून!
सणासुदीला मात्र वाढणे घेइ तुझे चोपून!