शिवरात्र विषय - दाशार्ह कथा

प्रथम पूजनोत्तर

प्रथम प्रहरींची पूजा हे घेतली । कृपा थोर केली आम्हांवरी ॥१॥
भजन पूजनांत आम्हां रत केले । चित्त लावविले निजपदी ॥२॥
शिवशिव नाम परम कल्याणाचे । येतांच ते वाचे पाप जळे ॥३॥
धन्य शिवार्चन शिवाचे दर्शन । शिवाचे स्मरण पुण्याईचे ॥४॥
महापातकांचा नाश होत असे । पुनीत होत असे चांडाळही ॥५॥
सहस्त्रवधि पापे जळोनियां जाती । पुण्यात्मे ते होती शिवभक्त ॥६॥
दाशार्हासी आला ऐसा अनुभव । नामाचे वैभव कळले त्या ॥७॥
कलावतीसंगे अंगी दाह झाला । राव घाबरला फ़ार मनी ॥८॥
सांगे कलावती शिवाचा महिमा । गात जावे नामा ऐसे सांगे ॥९॥
गर्गापाशी जात उपदेश घेत । मन्त्रासि जपत नम: शिवाय ॥१०॥
काकरुपे पापे निघाली अंगातूनी । गेली ती जळोनि मंत्रतेजे ॥११॥
विनायक म्हणे तोच नाममन्त्र । मज ठायी गिरित्र सिद्ध करी ॥१२॥