TransLiteral Foundation

अभंग - ८३९१ ते ८४००

तुकारामबाबा आणि त्यांचे शिष्य यांच्या अभंगांची गाथा.


अभंग - ८३९१ ते ८४००
॥८३९१॥
अंधारानें दीपा आणियेली शोभा । माणिकासी प्रभा कोंदणाची ॥१॥
रोगियानें वैद्य आणिला उजेडा । नाहीं तरी द्वाडा कोण पुसे ॥२॥
कल्पतरुची कीर्ति कैसेनि वाढती । कल्पना नसती वाचकासी ॥३॥
परिसाचा महिमा वाढतो कशानें । लोह निरमाण नसतें जरी ॥४॥
तुका ह्मणे आह्मी असोनियां जन । तुज देवपण आणियेलें ॥५॥

॥८३९२॥
देह देवपाट हृदयसंपुष्ट । आंत कृष्ण मूर्त बैसविली ॥१॥
प्रेमाचें हें पाणी प्रक्षाळीन तूज । आत्मा सखा निज पांडुरंग ॥२॥
भाव करुनी गंध भक्तीच्या अक्षता । लाविल्या अनंता निढळासी ॥३॥
मन केलें मोगरा चित्त केलें शेवंतीं । सत्वाच्या तुळसी अर्पियेल्या ॥४॥
जळो क्रोध धूप उजळो ज्ञानदीप । ओंवाळूं स्वरुप पांडुरंग ॥५॥
षड्रस पक्वान्नें केलीं कृष्णार्पण । इच्छिलें भोजन समर्पिलें ॥६॥
तुका ह्मणे पूजा केली मनभावें । पंच प्राणासंवें समर्पिली ॥७॥

॥८३९३॥
आपुल्या हातीं तुह्मी कापा माझी मान । जगांत अपमान करुं नका ॥१॥
वैर्‍याहातीं वर्म नका देवूं देवा । अभिमान केशवा राखी माझा ॥२॥
तुजविण कवणा यावें काकुळती । कोण कामा येती अंत काळीं ॥३॥
तुका ह्मणे झालों लहानाहुनी लहान । पायींचा मी दीन दास तुझा ॥४॥

॥८३९४॥
सेतीं बिज नेतां थोडें । मोठे आणिताती गोड ॥१॥
एक्या नामें हरि जोडे । फिटे जन्माचे सांकडें ॥२॥
बाळे भोळे जन । सर्व तरती कीर्तनें ॥३॥
तुका ह्मणे तेणें मुढें । नाम स्मरावें साबडें ॥४॥

॥८३९५॥
जासी तरी जाई संतांचिये गांवा । होईल विसांवा मना तेथें ॥१॥
करिसी तरी करी संतांची संगत । आणिकांची मात नको मना ॥२॥
बैससी तरी बैस संतांचिये मधीं । आणिकांची बुद्धि नको मना ॥३॥
तुका ह्मणे संत कृपेचे सागर । मना निरंतर घ्यावी धणी ॥४॥

॥८३९६॥   
कलियुगीं साधन नामाविण नाहीं । यासाठीं लवलाही नाम घ्यावें ॥१॥
नामस्मरणी कांहीं न करावा अळस । कैलासीं महेश नाम घ्यावें
पाताळीच्या शेषा नामाचा आधार । नामेंचि समुद्र शिळा तारी ॥३॥
तुका म्हणे नाम साधनाचें सार । विष हें अमर नामें झालें ॥४॥

॥८३९७॥
निरंजनभवनीं देखियेली गाय । तीन तिसी पाय चार मुखें ॥१॥
सहस्त्र शोभती डोळे नौ तिसी कान । सत्रावीचें स्थान संग एक ॥२॥
ऐसी कामधेनु व्यासांनीं पाळिली । शुकांनीं वळिली जनकाघरीं ॥३॥
तुका ह्मणे गाय भाग्यें नरा भेटे । अभाग्य करंटे वांया गेले ॥४॥

॥८३९८॥
सत्वाचें शरीर भवाचें कीर्तन । प्रेम जनार्दन उभा तेथें ॥१॥
अहिंसा मृदंग अद्वैताची टाळी । प्रेमाची आरोळी हरिनाम ॥२॥
सप्रेमाचा विणा नि:संगाच्या तारा । आणिला दरारा पातकांसी ॥३॥
जगत्रयजीवन योगियांचा राणा । ध्यानीं मनीं आणा तुका ह्मणे ॥४॥

॥८३९९॥   
मनुष्य संसारीं उदंड अन्यायी । ह्मणोनियां नाहीं भेटी देवा ॥१॥
ऐसें जरी मनीं धरिसील कांहीं । मग सर्वथा ही नव्हे भेटी ॥२॥
वायां दवडूं नको आवड भेटीची । सई आनाथाची न विसरें ॥३॥
तुका म्हणे दिली नामाची आवडी । तैसी घाली उडी भेटावया ॥४॥

॥८४००॥   
पहिलाच जरी असतों अज्ञान । तरी कांहीं सीण न वाटता ॥१॥
नामाचें चिंतन दिलें दारीं घरीं । चित्त भेटीवरी रात्रंदिस ॥२॥
अगा जरी मन कठीण कराल । बहुत होतील कष्ट मज ॥३॥
तुका म्हणे आतां देऊं नको सीण । पहिलें वचन दिलें आहे ॥४॥

Translation - भाषांतर
N/A

References : N/A
Last Updated : 2019-08-01T21:54:14.5170000

Comments | अभिप्राय

Comments written here will be public after appropriate moderation.
Like us on Facebook to send us a private message.

बातमी-बातमी ठेवणें-राखणें

  • टेहेळणी करणें, बातमी काढणें. 
RANDOM WORD

Did you know?

Gotra. Vats & vatsayan are same ?
Category : Hindu - Traditions
RANDOM QUESTION
Don't follow traditions blindly or ignore them. Don't assume a superstition either. Don't be intentionally ignorant. Ask us!!
Hindu customs are all about Symbolism. Let us tell you the thought behind those traditions.
Make Informed Religious decisions.

Featured site

Ved - Puran
Ved and Puran in audio format.

Status

  • Meanings in Dictionary: 644,289
  • Dictionaries: 44
  • Hindi Pages: 4,328
  • Total Pages: 38,982
  • Words in Dictionary: 302,181
  • Tags: 2,508
  • English Pages: 234
  • Marathi Pages: 22,630
  • Sanskrit Pages: 11,789
  • Other Pages: 1

Suggest a word!

Suggest new words or meaning to our dictionary!!

Our Mobile Site

Try our new mobile site!! Perfect for your on the go needs.