नामदेवाचें चरित्र - राजाईचा संशय फेडिला मनींच...

राजाईचा संशय फेडिला मनींचा । कळला पूर्ण साचा पांडुरंग ॥१॥
भावें ते राजाई म्हणे नामदेवा । सज्जन हा ठावा पांडुरंग ॥२॥
विठ्ठलावांचुनी आणिक नाहीं थोर । धरिला निर्धार राजाईनें ॥३॥
विकल्प सांडुनी मन केलें शुद्धा । धरिला गोविंद मनामाजी ॥४॥
नामा ते राजाई जाहाला एकभाव । लावियेला जीव विठ्ठलपायीं ॥५॥
नारा विठा मोंदा माहादा आउबाई । त्यानीं धरिला पायीं पांडुरंग ॥६॥
नामयाची दासी नागी दुसरी जनी । त्यांनीं सेवा करुनी केला देव ॥७॥
एकभाव पहा लाविला विठ्ठला । त्यांनी जवळ केला पांडुरंग ॥८॥
विठ्ठलावांचोनी दुजें नाहीं मनीं । गेलें लोटांगणीं देवराया ॥९॥
ऐसा त्याचा भाव कळला देवासी । सकळ वैकुंठासी पाठविले ॥१०॥
अंतकाळीं नामा धरिला ह्रदयीं । ठेवियेला पायीं गोंदा म्हणे ॥११॥