गृहवास्तुप्रकरणम् - गृहप्रवेशनम्

वास्तुशांतेः प्राक्पश्चाद्वा ज्योतिर्विदुक्ते शुभे मुहूर्ते गृहप्रवेशं कुर्यात् । स चेत्थं नवजलपूर्णं शुभपल्लवोपेतं दूर्वायुतं गंधादिलिप्तं वस्त्रवेष्टितं सफलं कलशं अंजलिना गृहीत्वा यजमानः सपत्नीको ब्राह्मणान्वितः सपुत्रः सामात्यस्तूर्यमंगलवाद्यघोषेण तदेव लग्नमिति पठन् गृहं प्रविश्य गृहमध्ये धान्योपरि तं कलशं स्थापयेत् । ततो गृहस्थैर्यार्थं पुण्याहं वाचयेत् । तत्र ‘ मह्यं सकुटुंबिने ’ इत्यादि वाक्यांते ‘ ममास्य कृतनवगृहप्रवेशाख्यस्य कर्मणः पुण्याहं भवंतो ब्रुवंतु ’ इत्यादि सर्ववाक्योहः कार्यः ततो ब्राह्मणान्संपूज्य दक्षिणां दत्त्वाऽऽशिषो गृहीत्वा ‘ शिवोवास्तुः शिवो वास्तुः शिवो वास्तुरिति भवंतो ब्रुवंतु ’ इति विप्रान् वाचयित्वा सुह्रद्भिः सह भुंजीत ॥ ॥ इति गृहप्रवेशप्रयोगः ॥