गांव जळे नि हनुमान बेंबी चोळे

मराठी वाक्संप्रदाय - वाक्यप्रचार

   १. रामायणातील गोष्‍ट ! सीताशुद्धीसाठी मारुति लंकेत गेला. तेव्हां अशोक वनातील झाडे तोडल्‍याबद्दल शिक्षा म्‍हणून रावणाने मारुतीच्या शेपटीला आगल लावली. तेव्हां मारुतीने आपली शेपटी शाबूत राखून सारी लंका नगरी पेटविली नि हाहाःकार उडवून दिला अशी कथा आहे. त्‍यावरूनच ही म्‍हण पडली. लंका जवत होती त्‍याचे हनुमंताला काय होय ! तो आपला आगीकडे शांतपणे पाहात होता नि गमतीने बेंबी चोळीत होता. तसेच इतरांचे काही का नुकसान होईना, कितीका कठीण प्रसंग ओढवेना, काही लोक शांतपणे नि तिर्‍हाईतवृत्तीने त्‍यांच्याकडे पाहातात. २. मारुतीचे देवालय बहुतकरून गांवाच्या बाहेर असते, त्‍यामुळे गांव जळाल्‍यास मारुतिराय सुखात असतात. त्‍याप्रमाणेच लोकांचे काही का होईना, काही राजेलोक आनंदात, ऐषआरामात पोटावर हात फिरवून किंवा रयतेवर हात फिरवून आपला काळ घालवितात.