दुर निजलासि का रे समय सुखाचा पाहून ।
काय करू मी आता, करि घरी ये रे धाउन ॥ध्रु०॥
जिवलग जीविंचा सखा तुजविण कोणी नाही ।
सुखादुखाचा रे साथी, मनि विचारुन पाही ॥
चुक जरी पडली घडली मजपुन रोज काही ॥चाल॥
तरी धीर देउन मनासी घे रे सख्या सर्व पाहून ॥१॥
नव्या नवतिची तनु ऐन भरत आली।
ख्यालिखुशालित सदा लुटा रसरंगलाली ॥
नका दिस दवडू सुना, अशा वैभवात महाली ॥चाल॥
घडोघडी कवळुन मला बसा आनंदात घेऊन ॥२॥
कसा तरि जिरसिल तू रे काळजी हीच पडली ।
म्हणुन झुरणी जिवा अशा शरिरास जडली ॥
नको करू निष्ठुर मन अनायसे प्रित घडली ॥चाल॥
कर समजावणी तू आत एकांतात नेऊन ॥३॥
म्हणे गंगु हैबती ग ठिव लय लक्ष पाई ।
मन मर्जी रक्षुन रहा नको करू व्यर्थ घाई ॥
महादेव गुणी जन नित नवे छंद गाई ।
प्रभाकर ख्याल करी नवल परी अर्थ लाऊन ॥४॥