का रे रुसलासी सगुण गुण रासी ।
उठ चाल घरासी ॥धृ०॥
पडला घरी सुना रे महाल मिन्याचा ।
निर्मळ एन्याचा ॥
धरलास का रुसुन थार जिन्याचा ।
आला त्रास जुन्याचा ॥
जातो रंग बहार दिवस सोन्याचा ।
फालगुन महिन्याचा ॥चाल॥
भिडु दे लवकर ह्या ऊर उरासी ॥१॥
करता मन कठोर का हो कृपाळा ।
मज सुखात पाळा ॥
हलविन कधी नटुन थटुन झोपाळा ।
अरे धन्य कपाळा ॥
फुटला शरिरात ह्या काम उपाळा ।
कर शांत नृपाळा ॥चाल॥
धरीते निरलज्यपणे पदरासी ॥२॥
सख्या सगुणा रे विनंत्या करते ।
कवटाळुन धरते ॥
द्या द्या पुढे पाय स्तनाने चुरते ।
म्हणुन भवती फिरते ॥
पहारे तरी हास्य मुखाने वरते ।
उभय कर पसरते ॥चाल॥
डसला जणू विंचु मदन शरिरासी ॥३॥
पलंगी क्षण भर तरी स्वस्थ ठरा हो ॥
मग रागे भरा हो ॥
चढला शिरी काम रतुन उतराहो ।
नाही धीर जरा हो ॥
गंगु हैबती म्हणे संग कराहो ।
ह्रदयासी धराहो ॥
महादेव गुणिराज जरब इतरांसी ।
भीती प्रभाकरासी ॥४॥