पसरित्ये पदर महाराज एकांती चला ।
जिव जातो विषयाने गांजिले मला ॥धृ०॥
तुम्ही सर्वगुणसंपन्न प्राणप्रियकरा ।
काही माझी किंचित तरी माया करा ॥
छळू नये असे कुळवंताच्या लेकरा ।
आवडेना बोलणे शब्द शर्करा ॥चाल॥
जन्माची अक्षयी झाले संगतिण ।
दोहो घरची मी माषुक श्रीमंतिण ॥
नव्हे गरजी कोण कसबिण कळवंतिण ॥चाल॥
आज उदास मर्जी कशावरून ही जाहली ।
जिवलगा उठा ह्या समयी चला रंग महाली ॥
घडोघडी देहामध्ये विषयबाण करि कहाली ॥चाल॥
झाली रात्र गजर दोन प्रहरचा वाजला ।
शनि चंद्र मंगळ माथ्यावर आला ॥१॥
ह्या विषयसुखाचे स्वामी आपण जिवलगा ।
किती सांगू उघडून आवडत्या नगा ॥
मुखचंद्र गेंद टवटवित माझे बघा ।
मिठी मारा सळसळती सार्या रगा ॥चाल॥
मऊ मांड्या कंबर सिंहासारखी ।
तुम्ही त्यात अत्यंत विषयपारखी ।
भर ज्वानी हा विस्तव जणु रखरखी ॥चाल॥
पुढे वंशवृद्धी करण्यास्तव कंबर बांधा ।
पाचवा दिवस घात सुमुहुर्त साधा ॥
रत झाल्या उभयता उतरेल उत्तम रांधा ॥चाल॥
वेधले चित्त हकनाक उशिर लावला ।
सुख भोगा मनोरथ पुरवा चांगला ॥२॥
नवी तरणी नार मी तरुणदशेमधी तुम्ही ।
घरी नाही धन संपत्तिल काही कमी ॥
थोरांनी असे दुर्बलास करु नये श्रमी ।
लग्नात पाटावर दिली हमी ॥चाल॥
मग अता हयगय का मांडली ।
अपराधावाचुन माया सांडली ॥
हरणिला अडचणीत कशी कोंडली ॥चाल॥
लटपटित कासोटा सैल झाली पहा निरी ।
पटपटा पाई डोइ ठेविता पुसली चिरी ॥
कोठे बाळी उडाली घाईत कोथिंबिई ॥चाल॥
विखुरला भांग सर्वांगी घाम दाटला ।
अरे देवा किती जिव आपला आटला ॥३॥
अहो उठा सख्या बेलाशक मजवर तुटा ।
आधी दाबा एक एक बळकट बाहुटा ॥
सुखात करा मग रंग प्रहरभर लुटा ।
मी सुटल्यावर कळेल तेव्हा तुम्ही सुटा ॥चाल॥
मुख माझे कुरवाळा कुळभूषणा ।
सकुमारा हे प्रिय अमृत भाषणा ॥
बहुतांच्या लालन पालन पोषणा ॥चाल॥
कवि गंगु हैबती शाहिर नामांकित ।
करतात कवन गातात मधुर नोकित ॥
महादेव गुणिजन प्रभुचे आज्ञांकित ॥चाल॥
म्हणे पंत प्रभाकर समय निघुन चालला ।
आम्ही जातो तुम्ही इष्क करा आपुला ॥४॥