माझें मागणें, मागणें हें तव पायीं ।
ऐक्य भक्ति ही मला देई । माझें मागणें ॥धृ०॥
नांव जरी भक्त, तरी नोव्हे विभक्त ।
प्रेम लक्षणा करणें व्यक्त । प्रेम लक्षणें, चित्त होय सक्त ।
अखंड हरीपदीं अनुरक्त । माझें मागणें० ॥१॥
देई तव भक्ति, भक्ति अंतरींची । वार्ता नसो ती द्वैताची ।
प्रेमरस भरें, गोडी लागो त्याची ।
इच्छा पुरवी ही मनींची ।माझें मागणें० ॥२॥
हरी तुझ्या ऐक्य, भक्तींत रंगावें ।
स्वानंद सुखा न भंगावें । अखंड तव नाम प्रेमाने गावें ।
वारीसी हेंची तुंवा द्यावें । माझें मागणें० ॥३॥