मंगल आरति प्रिया प्रीतमकी । मंगल प्रीति रीति दोउनकी ॥
मंगलकान्ति हँसनि दसननकी । मंगल मुरली बीनाधुनकी ॥
मंगल बनिक त्रिभंगी हरिकी । मंगल सेवा सब सहचरकी ॥
मंगल सिर चंद्रिका मुकुटकी । मंगल छबि नैननिमें अटकी ॥
मंगल छटा फबी अँग अँगकी । मंगल गौर स्याम रसरँगकी ॥
मंगल अति कटि पियरे पटकी । मंगल चितवनि नागरनटकी ॥
मंगल शोभा कमलनैनकी । मंगल माधुरि मृदुल बैनकी ॥
मंगल बृंदाबन मग अटकी । मंगल क्रीड़न जमुना तटकी ॥
मंगल चरन अरुन तरुवनकी । मंगल करनि भक्तिहरि जनकी ॥
मंगल जुगलप्रिया भावनकी । मंगल श्रीराधा-जीवनकी ॥