TransLiteral Foundation
Don't follow traditions blindly or don't assume a superstition either.
Don't be intentionally ignorant. Ask us!! Make Informed Religious Decisions!!

निर्वाण प्रकरण - ६५६२ ते ६५७०

तुकारामबाबा आणि त्यांचे शिष्य यांच्या अभंगांची गाथा.


निर्वाण प्रकरण - ६५६२ ते ६५७०
प्रयाणकाळीं तुकारामबावांनीं स्त्रीस सांगातें यावें ह्मणून बोलणें केलें ते समयीं संसार सांडून येत नाहीं असें म्हटल्यावरुन उपदेश केला तो.

॥६५६२॥
होसी पुत्रवंती नारायण सुखें । पहासी पुत्रमुख आशिर्वचन ॥१॥
जातां हा शेवट त्वां गोड केला । कळस झाला येथूनियां ॥२॥
तुका ह्मणे आतां झालें समाधान । समाखिलें मन सेवटीचें ॥३॥

॥६५६३॥
स्त्रियेसी हो तुका जातो सांगोनियां । बैसा ह्मणोनियां जातों आह्मी ॥१॥
सडा संमार्जन तुळसीवृंदावन । देवाचें पूजन करित जावें ॥२॥
तुझिये गर्भी आहे नारायण । तो तुजलागोन उद्धरील ॥३॥
ऐसे बोलोनीयां तुका पुढें आले । सद्गदित झालें हृदय तिचें ॥४॥
====

तुकाराम बावा वैकुंठास चालले असें समजून जिजाबाई त्यास सांगातें प्रवासाची सामोग्री व कांहीं पैसा घेऊन जा असें ह्मणाली तेव्हां बोलले.

॥६५६४॥
आम्हा हेंचि भांडवल । ह्मणों विठ्ठल विठ्ठल ॥१॥
सुखें तरों भवनदी । संगें वैष्णवांची मांदी ॥२॥
वाखराचें वाण सांडूं । हें जेऊं जेवण ॥३॥
नलगे वारंवार । तुका ह्मणे येरझार ॥४॥

॥६५६५॥
आतां हेंची जेऊं । सवें घेऊं सिदोरी ॥१॥
हरिनामाची खिचडी काला । प्रेमसाधनें मोहिला ॥२॥
चवीं चवीं घेऊं ग्रास । ब्रह्मरस आवडी ॥३॥
तुका ह्मणे गोड लागे । तों तों मागे रसना ॥४॥
====

तेव्हा तुकाराम बावा ह्मणाले कीं आतां वैकुंठास चलावें मग तुकाराम बावा आपले समागमें संत होते त्यांस व बंधु व स्त्रीपुत्र यांस बोलिले कीं मी वैकुंठास जातों तुह्मी सकळ समागमें चला तुह्मांसही नेतों तेव्हां अभंग बोलिले.

॥६५६६॥
अवधियांच्या आलों मुळें । एक वेळे न्यावया ॥१॥
सिद्ध व्हावें सिद्ध व्हावें । आधीं ठावें करितों ॥२॥
जोंवरी ते घटका दुरी । आहे उरी तो काळ ॥३॥
मंगळाचे वेळे उभे । असों शोभे सावध ॥४॥
अवघियाचा योग घडे । तरी जोडे श्लाघ्यता ॥५॥
तुका ह्मणे पाहें वाट । बहु आट करुनियां ॥६॥

॥६५६७॥
स्वल्प वाट चला जाऊं । वाचे गाऊं विठ्ठल ॥१॥
तुह्मी आह्मी खेळों मेळीं । गदारोळी आनंद ॥२॥
ध्वजा कुंचे गरुडटके । शृंगार निके करुनियां ॥३॥
तुका म्हणे हेंचि निट । जवळी वाट वैकुंठ ॥४॥
====

संगातें कोणी येत नाहीं असें पाहून तुकाराम तेथून निघाले.

॥६५६८॥
रणीं निघतां शूर न पाहे माघारें । ऐसा मज धीरें राख आतां ॥१॥
संसाराहातीं अंतरलों दुरी । आतां कृपा करी नारायणा ॥२॥
वागवितों तुझ्या नामाचें हत्यार । हाचि बडिवार मिरवितों ॥३॥
तुका ह्मणे मज फिरतां माघारें । तेथें उणें पुरें तुम्ही जाणा ॥४॥

॥६५६९॥
केलें शकुनें प्रयाण । आतां मागें फिरे कोण ॥१॥
होय तैसें होय आतां । देहबळी काय चिंता ॥२॥
पीडिले पालवीं । त्यांचा धाक वाहे जीवीं ॥३॥
तुका ह्मणे जिणें । देवा काय हीनपणें ॥४॥
====

मग अभंग गात गात राउळीं परत आले तो अभंग.

॥६५७०॥
झालें समाधान । तुमचे धरिले चरण ॥१॥
आतां उठावेसें मना । येत नाहीं नारायणा ॥२॥
सुरवाडिकपणें । येथें सांपडलें केणें ॥३॥
तुका म्हणे भाग । गेला निवारला लाग ॥४॥

Translation - भाषांतर
N/A

References : N/A
Last Updated : 2019-04-15T19:55:16.3970000

Comments | अभिप्राय

Comments written here will be public after appropriate moderation.
Like us on Facebook to send us a private message.

सचिल

  • न. सचैल स्नान . न फिटे केलया सचिल । - गीता २ . १५८९ . - वि . ( अप . ) सचैल ; सवस्त्र ; अंगावरील वस्त्रासह ( स्नान ). [ सं . स + चैल = वस्त्र ] 
RANDOM WORD

Did you know?

"Maruti namaskar"
Category : Hindu - Beliefs
RANDOM QUESTION
Don't follow traditions blindly or ignore them. Don't assume a superstition either. Don't be intentionally ignorant. Ask us!!
Hindu customs are all about Symbolism. Let us tell you the thought behind those traditions.
Make Informed Religious decisions.

Featured site