तृतीय पटल - उग्रासनकथनम्

प्रसार्य चरणद्वंद्वं परस्परमसंयुतम् ।
स्वपाणिभ्यां दृढं धृत्वा जानूपरि शिरोन्यसेतू ॥१११॥

आसनोग्रमिदं प्रोक्तं भवेदनिलदीपनम् ।
देहावसानहरणं पश्चिमोत्तानसंज्ञकम् ॥११२॥

य एतदासनं श्रेष्ठं प्रत्यहं साधयेत् सुधी: ।
वायु: पश्चिममार्गेण तस्य संचरति ध्रुवम् ॥११३॥

एतदभ्यासशीलानां सर्वसिद्धि: प्रजायते ।
तस्माद्योगी प्रयत्नेन साधयेत् सिद्धमात्मन: ॥११४॥

गोपनीयं प्रयत्नेन न देयं यस्य कस्यचित् ।
येन शीघ्रं मरुत्सिद्धिर्भवेद्दु:खौघनाशिनी ॥११५॥