चरित्र - भाग २

श्रीगोंदे येथील शेख महंमदाचे मठांतील एका हस्‍तलिखित वहीत शेख महंमदाचे चरित्र दिले आहे. त्‍यांत लेखक व लेखनकाल यांचा निर्देश नाही. हे चरित्र अप्रसिद्ध असल्‍यानें त्‍यांतील मुख्य भाग पुढें उद्‌धृत करितोः
‘‘शेख महंमद पीर कबराचा अवतार । तयाचें चरित्र ऐका तुम्‍ही ॥१॥
श्रीगोंदियामध्ये पेठ मकरंदपूर । तेथें अवतार शेख महंमद ॥२॥
राजे महमंद पिता । पुव्हलेशा माता पतिव्रता । त्‍यांचें पोटीं संत अवतार ॥३॥
.... अखंड समाधि गुंफेत बैसावें । मनीं जिवीं भावें हरिनाम ॥५॥
......अवतारलीला दाविली अपार । संत साधु थोर वर्णित गेले ॥८॥
तुकोबा आणिक स्‍वामी जयराम । रामदासा प्रेम चरणीं त्‍यांच्या ॥९॥
.....अनादि सिद्ध साधु योगी दिगंबर । अविंधांत पीर मराठ्यांत साधु ॥१३॥
.....नित्‍य गमन करीं हिंडे चारी दिशां । जुती जोडा मासा एक लागे ॥१६॥......’’.

‘‘योगसंग्राम ग्रंथ तेव्हां आरंभिला । विचार तो केला सिद्ध तेव्हां ॥१८॥
सिद्ध करूनि ग्रंथ धाडिला वाराणसी । माने कीं दुषीती पहावया ॥१९॥
तेव्हां काशीमध्यें लोकांनी पाहिला । भाविकीं वंदिला करूनी नमन ॥२०॥
ब्राह्मण षड्‌शास्त्रीं अंगीं विद्यागर्व । निखंडिला सर्व ग्रंथ त्‍यांनीं ॥२१॥
अविंदाची वाणी नायकावी कानीं । ग्रंथ तो उचलोनी त्‍यांनीं नेला ॥२२॥
 नेऊनियां ग्रंथ पाण्यांत बुडविला । विचार तो केला नाहीं त्‍यांनीं ॥२३॥
सेख महंमदासी अंतरीं कळले । पाण्यांत बुडविलें ग्रंथालागीं ॥२४॥
आपुल्‍या शिष्‍यांसी दृष्‍टांत दाविला । मागूनि वहिला ग्रंथ आणा ॥२५॥
ग्रंथ नेला काशीं होते दोघेजण । ब्राह्मणालागून बोलविलें ॥२६॥
आमचा ग्रंथ द्यावा आम्‍ही घेऊनि जातों । सांगातें विप्र तो एक आला ॥२७॥
ग्रंथ काढावया पाण्यांत तो गेला । कोरडा निघाला ग्रंथ तेव्हां ॥२८॥
ब्राह्मणांकारणें नवलाव जाला । ग्रंथ तो आणिला अवघ्‍या जवळीं ॥२९॥
समस्‍तीं मिळोनि नवलाव केला । ग्रंथ तो वंदिला भाळावरी ॥३०॥
कोरडे कागद निघाले बरवे । कैसीं त्‍या म्‍हणावी अविंद वाणी ॥३१॥
भाविक ब्राह्मण दोघेहि निघाले । शिष्‍यासंगें आलें श्रीगोंदिया ॥३५॥
.....ग्रंथ योगसंग्राम पुढें ठेवियेला । जगमान्य जाला काशीमध्यें ॥३७॥’’.

टीपः
बाडांक ४, क्र. संदर्भांक ३४०, शेख महंमद मठ संग्रह; ओव्या १३७ - ‘‘संपूर्ण चरित्र शेख महमंदाचें.’’ यांतील उतारे (एकदोनच) श्री. वागळे यांनी आपल्‍या ‘योगसंग्रामा’च्या प्रस्‍तावनेत दिले आहेत.