स्त्रीगीत - गौरीहर

बसे नाहुनि मासुनी । पूजायासी गौरीहर
नव वधू ही सुंदर । भाग्यशाली ॥१॥
मांडवाच्या दारावरी । झुले नारळी तोरण
विवाहाचे आमंत्रण । सकलासी ॥२॥
आली मंगल घटिका । वाद्ये वाजती सुस्वर
हृदयात हुरहुर । बालिकेच्या ॥३॥
येतिल बाई मिरवत । आता माझे प्राणनाथ
जन्माची माझी गांठ । त्यांच्यासंगे ॥४॥
कसा असेल हा जीव । कशी ठेवण चित्ताची
माझ्या चित्ताला साजेशी । असेल कां ॥५॥
माझ्या डोळ्यातले भाव । कळतिल काय त्यांना
एकरुप भावनांना । होतील कां ॥६॥
माझ्या अंतरीचे बोल । काय त्यांना रूचतील
नाही कां हसतिल । माझ्या बोला ॥७॥
गृह राज्याची स्वामीनी । बाई उद्या होईन का
सुफलित होतिल कां । मनोरथ ॥८॥
पाठ राख अंबाबाई । सारे पुरवोनी हेत
जोडियेले दोन्ही हात । तुझे पाई ॥९॥