स्त्रीगीत - घाण्याची ओवी

(विवाह प्रसंगी 'घाणा' भरण्याची एक मंगल प्रथा आपल्याकडे आहे. त्यावेळी सुवासिनी ओव्या म्हणून प्रसंगाला शोभा आणतात. अशा प्रसंगी साजेशा ओव्या खाली दिल्या आहेत.)

प्रारंभी नमन । करूं मोरयाला
या हो सिध्दतेला । सर्वां आधी ॥१॥
तुम्ही येता क्षणी । पळती विघ्ने दूर
प्रताप एसा थोर । काय वानूं ॥२॥
मंगल कार्य हे ।----बाईचे
लाडक्या बहिणीचे । भावंडांच्या ॥३॥
काय बाई सांगू । भाग्याची माझी लेक
होतसे कवतुक । घरी दारी ॥४॥
म्हणती लेकीवर । बापाची माया मोठी
परघरी जाणार ती । म्हणुनी का ? ॥५॥
पाहुनी शुभ दिन । मुहूर्त आज केला
पाच सुवासिनी आल्या । मदतीला ॥६॥
नको कांही उणे । तयारी जय्यत
ठेवावी बडदास्त । पाहुण्यांची ॥७॥
चौरंगी बैसरोनी । विहीणींचे पाय धुवा
नारळ बाई हवा । ओटीसाठी ॥८॥
लाडू गडू परी । धीवर तारफेण्या
रुखवता शोभा आणा । कौशल्याने ॥९॥
बापाजी तालेवार । खिसा ठेवा जरा सैल
लग्नाचा डामडौल । आहे मोठा ॥१०॥
दारी घातलासे । मांडव ऎसपैस
पाहूणे शेपन्नास । यायचेत ॥११॥
येणार्‍या सकलांची । चौकशी करा नीट
खाण्यापिण्याची कपात । करूं नका ॥१२॥
झाल्या केल्यासाठी । जोडावे गणगोत
सारी माणसे हवीत । कार्यामधे ॥१३॥
आल्या सार्‍याजणी । मावशी आत्या मामी
कौतुका नाही कमी । ----ताईच्या ॥१४॥
धुमधडाक्यांत । लग्नाचा करूं थाट
वरद राहो हस्त । अंबाबाईचा ॥१५॥