आले आले रावजी! गेले गेले रावजी!

मराठी वाक्संप्रदाय - वाक्यप्रचार

   रावजी नावाचा बावळट दिसणारा परंतु महा बिलंदर माणूस एका खेडेगावात आला असतां तेथील ग्रामस्थांनी त्याची गंमत करण्याचे ठरविले. त्याप्रमाणे त्यास बायकोचे सोंग देऊन तमाशात नाचण्यास लाविले. बायकोचे सोंग घेण्याकरितां त्याच्या अंगावर उंची लुगडे व दागदागिने घातले. रावजी खेळ्यांची फळी फोडून बाईच्या वेषात नाचला असतां सर्व खेळे व प्रेक्षक ‘आले आले रावजी!’ करू लागले व तोहि वेडेविद्रें नाचू लागला. त्याने लोकांना खूप हसविले व ‘गेले गेले रावजी!’ म्हणत एक एक पाऊल मागे घेतले. खेळेहि तसेच म्हणत मृदंग व टाळ वाजवूं लागले. व त्या गडबडीत रावजींनी पळ काढला. त्या टाळमृदंगाच्या आवाजात रावजी पळून गेल्याचे प्रथम समजले नाही. पण समजल्यावर शोध करूनहि रावजी सापडला नाही. अशा तर्‍हेने ग्रामस्थ रावजीला बनवून करमणूक करण्यास गेले पण रावजीनेच त्यांना बनवून दागिन्यांसह पळ काढला. यावरून एखादा दुसर्‍यास बनविण्यास गेला असतां स्वतःच बनला गेला तर वरील म्हण वापरतात.