विठाचे अभंग - आमुचें ठेवणें जुगादीचें न...

आमुचें ठेवणें जुगादीचें नाणें । जातां नामथानें सांगितलें ॥१॥
इतके दिवस पाहिली तुझी वाट । परि तूं उदास न बोलसी ॥२॥
तुजवांचोनी आम्हां कोण असे पोशिता । देईं कृपावंता नामप्रेम ॥३॥
आम्ही तुझीं सेवकें रंकाहुनी रंक । कठीण बोलणें निकें वदें तुज ॥४॥
म्हणोनी वेळोवेळां लागें तुझ्या पायीं । लटकीच गोबाई करूं नको ॥५॥
तुज आम्हासी वेगळीक नाहीं । तरी तूं न धरीं कांहीं दुजामाव ॥६॥
आपुलें म्हणावें अंधारीं ओळखावें । नामप्रेम यावें म्हणे विठा ॥७॥