अभंग भाग १

॥१॥
राम गावा राम ध्यावा । राम जीवींचा विसांवा ॥१॥
कल्याणाचें जें कल्याण । रघुरायाचें गुणगान ॥२॥
मंगळाचें जें मंगळ । राम कौसल्येचा बाळ ॥३॥
राम कैवल्याचा दानी । रामदासा अभिमानी ॥४॥

॥२॥
छत्रसुखासनीं अयोध्येचा राजा । नांदतसे माझा मायबाप ॥१॥
माझा मायबाप त्रैलोकीं समर्थ । सर्व मनोरथ पूर्ण करी ॥२॥
पूर्ण प्रतापाचा कैवारी देवांचा । नाथ अनाथांचा स्वामी माझा ॥३॥
स्वामी माझा राम योगियां विश्राम । सांपडलें वर्म थोर भाग्यें ॥४॥
थोर भाग्य ज्यांचें राम त्यांचे कुळीं । संकटीं सांभाळी भावबळें ॥५॥
भावबळें जेणें धरिला अंतरीं । तया क्षणभरी विसंबेना ॥६॥
विसंबेना कद आपुल्या दासासीं । रामीं रामदासीं कुळस्वामी ॥७॥

॥३॥
रत्नजडित सिंहासन । वरी शोभे रघुनंदन ॥१॥
वामांगीं ते सीताबाई । जगज्जननी माझे आई ॥२॥
पश्चाद्भगीं लक्षुमण । पुढें अंजनीनंदन ॥३॥
भरत शत्रुघन भाई । चौरे ढाळिती दोन्ही बाहीं ॥४॥
नळ नीळ जांबूवंत । अंगद सुग्रीव बिभीषण भक्त ॥५॥
देहबुद्धी नेणों कांहीं । दास अंकित रामापायीं ॥६॥  ॥७॥

॥ भजन ॥ रघुपि राघव राजाराम । पतीतपावन सीताराम ॥