शस्त्राभिघातवधबन्धनरेन्द्रपीडा
चिन्ताग्रहो विकलरुक्च गृहाश्रमेषु ।
चौराग्निभीतिधननाशयशः प्रणाशं
कुर्याद्विघातभयमत्र दशा कुजस्य ॥१॥
भौममध्ये भौमफलम् ।
भौमे शत्रुविमर्दः स्यात्कलहो बन्धुभिर्नृणाम् ।
स्वान्तरे बहुपीडा स्यादवृद्धस्त्रीगणिकारतिः ॥२॥
भौममध्ये बुधफलम् ।
भूपाग्निनृपचौरेभ्यो भयं पीडा ज्वरादिभिः ।
भूमिजान्तर्गते सौम्ये कलहो दुर्जनादिभिः ॥३॥
भौममध्ये शनिफलम् ।
महादुःखानि जायन्ते जलभीतिमतिर्नृणाम् ।
भौमस्यान्तर्गते मन्दे राजपीडाभयं नृणाम् ॥४॥
भौममध्ये गुरुफलम् ।
पुण्यतीर्थादिगमनं देवब्राह्मणपूजनम् ।
भौमस्यान्तर्गते जीवे लभते वित्तमुत्कटम् ॥५॥
भौममध्ये राहुफलम् ।
शस्त्राग्निनृपचोराणां भीतिर्मृत्युर्नृपाद्भयम् ।
भौमस्यान्तर्गते राहौ मनोदुःखं प्रवर्तते ॥६॥
भौममध्ये शुक्रफलम् ।
शत्रुभीतिर्महाक्लेशो धर्महानिः सुखं व्ययः ।
भौमस्यान्तर्गते शुक्रे भयं भूपात्स्वबन्धनम् ॥७॥
भौममध्ये रविफलम् ।
सम्मतो नृपतेर्भुरिप्रचण्डैः सह सङ्गतिः ।
मङ्गलान्तर्गते भानौ भवेत्कुस्त्रीसमागमः ॥८॥
भौममध्ये चन्द्रफलम् ।
बहुवित्तं सुत्दृत्सौख्यं मुक्ताहेममणिश्रियम् ।
भौमस्यान्तर्गते चन्द्रे प्राप्नोति परमं पदम् ॥९॥