घट भरे प्रवाहीं बुडबुडुनी-
न दिसे तुज का न पडे श्रवणीं ? ध्रु०
पदर गळाला, उडे वायुवर,
कुरळे उडती केसहि भुरभुर,
प्रमदे, बघ त्यां सांवर, आवर-
कां उभी प्रवाहीं शून्य मनीं ? १
स्वैर गार या झुळका वाहति,
मातीचा ये वास सभोवति,
क्षितिजीं बघ ढग वरवर चढती,
बघ घरा निघाल्या सोबतिणी. २
सळ डोळ्यांवर, काय पाहशी ?
कान देउनी काय ऐकशी ?
अचंचळ उभी व्याकुळ दिसशी-
का उचलिल घट येवोनि कुणी ? ३
पाउल नच तें, शेत सळसळे;
शब्द न मानवि, तारा बोले;
शीळ न, वायुच वंशीं खेळे;
कां विरघळशी भ्रमिं फिरफिरुनी ? ४
कवळुनि पद जल थरारुनि हले;
स्पर्शुनि शरिरा वारा बरळे,
वेलि हसति तुज फुलुनि बघ फुलें,
डोलती विनोदें तरु बघुनी ! ५