चिंतामणी महाराज रचित - मन माझें वेधलें गणराजीं ।...

मन माझें वेधलें गणराजीं । वृत्ति बैसली तुझे पायीं ॥धृ.॥
अहो वृथा माया लाविली हो कां मज बहु भारी ।
मोहापासुनी सोडवावें अरे तुज म्हणे एकभावें ॥ मन माझें० ॥१॥
अहो पुत्रदारा धनादिका । चाड नाहीं जन लोका ।
शरण कोणा जाऊं आणिका । अरे तूं मजवरी करी कृपा रे । मन माझें० ॥२॥
अहो पतितपावन नाम तुझें आहे रे त्रयलोकीं ।
ब्रीदावळी साच केली अरे मज थोर जोडी झाली । मन माझें० ॥३॥
अहो भ्रमर मन आहे हो लुब्ध तुझे पायीं ।
सुगंधित वास आंला आवागमन खुंटलें रे । मन माझें० ॥४॥
अहो दास तुझा विनवितो चिंतामणी देव ।
दीनरंका तारि वेगीं त्यासी लावी मुक्तिमार्गीं ॥ मन माझें० ॥५॥