भाद्रपदमास: - विष्णुपरिवर्तनविधि:

॥ भाद्रपदशुक्लद्वादश्यां विष्णुपरिवर्तनविधि: ॥

द्वादश्यां श्रवणमध्यभागे वा सायंकालव्यापिनि श्रवणे वा विष्णुपरिवर्तनोत्सवं कुर्यात । तत्र सन्ध्यायां कृतनित्यक्रिय:, आचम्य देशकालौ सङ्कीर्त्य, मम महापातकाद्यशेषपापनिवृत्तिपूर्वकश्रीमहाविष्णुप्रसादसिद्धिद्वारा श्रीपरमेश्वरप्रीत्यर्थं कृतविष्णुशयनोत्सवाङ्गभूतं भाद्रपदशुक्लद्वादश्यां विष्णुपरिवर्तनं करिष्ये । इति सङ्कल्प्य, देवं विविधोपचारै: सम्पूज्य, प्रार्थयेत्‌ । वासुदेव जगन्नाथ प्राप्तेयं द्वादशी तव । पार्श्वेन परिवर्तस्व सुखं स्वपिहि माधव ॥ अनेन विष्णुपरिवर्तनाख्येन कर्मणा तेन श्रीभगवान्‌ श्रीमहाविष्णु: प्रीयताम्‌ ॥