गाढवाचा घोडा बनविणें

मराठी वाक्संप्रदाय - वाक्यप्रचार

   काही केले तरी गाढवाचे घोडे बनणें शक्‍य नाही. यावरून अशक्‍य गोष्‍ट घडवूं पाहाणें. ‘रासभ धुतला महा तीर्थामाजी। नव्हे जैसा तेजी श्यामकर्ण।’-तुगा ३१११. ‘जाली गाढवी दुधाळ। महिमा गाईची पावला।’-तुगा ४४०८. याला तुकारामानेंच एक अपवाद केला आहे. तो म्‍हणजे संत सज्‍जन आहेत, ते काय वाटेल ते करूं शकतात, असे मत व्यक्त करण्यात झाला आहे. ‘गाढवाचे घोडें। आम्‍ही करूं दृष्‍टीपुढें।। चघळी वाहाणा। माघारिया बांडासुणा।। सोंग संपादणी। तरी करूं शुद्धवाणी।। तुका म्‍हणे खळ। करूं समयी निर्मळ।। -तुगा २०१७. येथे आम्‍ही दुष्‍टांसहि सुष्‍ट करूं, वाईटास चांगले करूं असे सांगितले आहे ते लक्षणेने घ्‍यावयाचे आहे.