अतिलोभो न कर्तव्यः चक्रं भ्रमति मस्तके

मराठी वाक्संप्रदाय - वाक्यप्रचार

   चार ब्राम्हण दारिद्यानें पीडित होऊन घराबाहेर पडले व ते फिरत फिरत एका सिद्धपुरुषाजवळ आले. त्यानें त्यांना चार वाती दिल्या व हिमालयांत जाऊन जेथें ज्याची वात पडेल तेथें त्यानें खणावें म्हणजे धन मिळेल असें सांगितलें. त्याप्रमाणें पहिल्याची जेथें वात पडली तेथें तांबे सांपडलें. पण तिघे पुढें चालले दुसर्‍याला रुप्याची खाण सांपडली तो फक्त तेथेंच थांबला. दोघे पुढें गेले. पैकीं एकाला सोन्याची खाण सांपडली. राहिलेल्याला वाटलें कीं, आपणांस आतां रत्नाची खाण सांपडेल म्हणून तो पुढें गेला. तो एका रक्तानें न्हालेल्या पुरुषाच्या डोक्यावर एक चक्र फिरत आहे असें दिसलें. त्याला त्याबद्दल प्रश्न विचारतांच तें चक्र याच्या डोक्यावर येऊन फिरुं लागलें व हा अति लोभामुळें संकटांत सांपडला. तेव्हां फार लोभ वाईट. ‘ अतिलोभो न कर्तव्यो लोभं नैव परित्यजेत्‍ । अतिलोभाभिभूतस्य चक्रं भ्रमति मस्तके ॥ ’ -पंचतंत्र ५.२०.