TransLiteral Foundation
Don't follow traditions blindly or don't assume a superstition either.
Don't be intentionally ignorant. Ask us!! Make Informed Religious Decisions!!
मराठी मुख्य सूची|मराठी साहित्य|गाणी व कविता|भा. रा. तांबे|संग्रह ३|
नदितिरीं उभी ती

नदितिरीं उभी ती

भा.रा.तांबे यांच्या कविता अत्यंत हळुवार असून त्या मनाला भिडतात


नदितिरीं उभी ती

नदितिरीं उभी ती दाट तृणीं,

आर्द्र वस्त्र ठिबके चरणीं. ध्रु०

नयन नभीं, कर दोन्ही जुळले;

केशपाश उरिं पाठीं रुळले;

तुफान ह्रदयीं घोर उसळलें;

ही पसरे छाया मुखिं नयनीं. १

बघति तुंगगिरि घेरा घालुनि,

थिजले तरुवर तिला पाहुनी,

स्थिरावले ढग पळतां गगनीं,

डोकावि बालरवि ढगांतुनी. २

असह्य छळ ज्यांस्तव सोशियला,

तेच निघाले टाकुनि मजला,

नभ कोसळलें, हाय कपाळा,

परि दुभंगे न देवा, धरणी ! ३

कोण कुणाचें जगतीं देवा ?

कोण दीर रे ? कोण सासवा ?

कुठला मायेचा ओलावा ?

गांजिलें भाजिलें दिनरजनीं !

म्हणति मींच कीं त्यांना गिळिलें,

करंटीच अवदसा जन्मलें,

खरेंच का हें देवा, सगळें ?

मग नको दावणें मुख फिरुनी ! ५

डोईवर चिमण्यांची पाटी,

पैसा अडका एक न गांठीं,

कोण पृथ्विच्या अफाट पाठीं ?

मग काय करिन तरि मी जगुनी ? ६

पिलें अर्पितें तुझिया चरणां

दयाघना, तुज त्यांची करुणा,

फुटेल पान्हा तुजविण कवणा ?

त्यां तूच माय, तूं बाप जनीं. ७

मायपोट तूं गंगामाई;

अगाध माया तुझिया ठायीं;

आल्यें धावत तुझिया पायीं;

दे ठाव तुझ्या डोहीं गहनीं ! ८

तुझा डोह मज महाल आई,

मऊ बिछाना तव तळ बाई;

करिल तुझा ध्वनि मज अंगाई,

किति शांत झोप येइल मरणीं !

उडी घालण्या टाकी चरणा,

विदारुनी तों वातावरणा

हंबरडा तो आला श्रवणां-

'गे आइ आइ ! जाशी त्यजुनी ! !' १०

ऐकुनि ती व्याकुळ किंकाळी

मटकन माउलि बसली खालिं;

निश्चय ढळला तो तत्कालीं,

हो ह्रदयाचें पाणि पाणी ! ११

घे ओढुनि पोटीं वत्सांला,

मोलमजूरी करीन बाळा,

भिक्षा मागिन रे वेल्हाळा !

परि भरीन हीं तोडें चिमणीं ! १२

Translation - भाषांतर
N/A

कवी - भा. रा. तांबे

जाति - नववधू

राग - जोगी

ठिकाण -लष्कर-ग्वाल्हेर

दिनांक - २३ ऑगस्ट १९२६

Last Updated : 2012-10-11T13:14:45.3900000

Comments | अभिप्राय

Comments written here will be public after appropriate moderation.
Like us on Facebook to send us a private message.

किरकिरा

  • वि. किरकिर करणारा कुरकुर्‍या ' नेहमी आईच्या कडेवर वागणारें पोर जसें किचकट व किरकिरें होत जातें ....' - नि ४२९ . 
RANDOM WORD

Did you know?

विविध पूजा अथवा होम प्रसंगी स्त्रीने पुरूषाच्या कोणत्या अंगास बसावे आणि हाताला हात कां लावावा?
Category : Hindu - Beliefs
RANDOM QUESTION
Don't follow traditions blindly or ignore them. Don't assume a superstition either. Don't be intentionally ignorant. Ask us!!
Hindu customs are all about Symbolism. Let us tell you the thought behind those traditions.
Make Informed Religious decisions.

Featured site